जनकपुरधाम, माघ २९ । हमासले गाजाबाट इजरायली बन्धकहरूको रिहाइ रोक्ने घोषणा गरेपछि अमेरिकी राष्ट्रपति डोनाल्ड ट्रम्पले कडा चेतावनी दिएका छन् ।
ट्रम्पले हमासले शनिबार दिउँसो १२ बजेसम्ममा सबै बन्धकहरूलाई रिहा गर्नुपर्ने बताएका छन् ।
ट्रम्पले गाजा युद्धविराम सम्झौताको भविष्यका लागि हमासलाई समयसीमा दिएका छन् ।
“यदि, शनिबार दिउँसो १२ बजेसम्ममा सबै बन्धकहरूलाई रिहा गरिएन भने युद्धविराम सम्झौता रद्द हुनेछ,” उनले भने, “अब सबै बाटो बन्द छन् । मलाई लाग्छ यो पर्याप्त समय हो ।”
ट्रम्पले सबै बन्धकहरूलाई एकैचोटि रिहा गरिने आशा व्यक्त गरेका छन् । एकैपटक रिहा नभए त्यसको परिणाम के हुन्छ हमासले बुझ्ने उनको उनको चेतावनी छ ।
हमासले के भन्यो रु
यसअघि हमासले इजरायली बन्धकहरूको रिहाइ रोक्ने बारेमा उल्लेख गरेको थियो । हमासले इजरायलमाथि युद्धविराम सम्झौता उल्लंघन गरेको आरोप लगाएको छ ।
हमासले विज्ञप्तिमा भनेको छ, “विगत तीन हप्तामा हाम्रो नेतृत्वले विपक्षीले बारम्बार युद्धविराम सम्झौताको उल्लंघन गरिरहेको र सम्झौताका सर्तहरू पालना नगरेको देखेको छ ।”
यसले उत्तरी गाजामा विस्थापित प्यालेस्टिनीहरूको फिर्तीमा ढिलाइ हुने विज्ञप्तिमा उल्लेख रहेको बीबीसीले जनाएको छ ।
हमासमाथि गाजा पट्टीका धेरै क्षेत्रमा गोलीबारी गरेको आरोप पनि लागेको छ ।
प्रकाशित मिति: २०८१ माघ २९, मंगलवार १०:११
