काठमाडौं , चैत १४ । प्रतिनिधिसभाको बैठक स्थगित भएको छ । विद्युत प्राधिकरणबाट कुलमान घिसिङलाई हटाउनुको कारणबारे प्रधानमन्त्री केपी ओलीले जवाफ दिनुपर्ने अडान राखेपछि बैठक सुरू नहुँदै स्थगित गरिएको हो ।
बैठक बिहान ११ बजेका लागि बोलाइएको थियो । तर, विपक्षीले अडान नछाडेपछि २ बजेसम्मको लागि बैठक स्थगितको सूचना टाँसिएको छ ।
हिजो पनि विपक्षी दलका सांसदहरूले उठेर विरोध जनाएपछि बैठक अवरुद्ध भएको थियो । यता राष्ट्रियसभा बैठक पनि विपक्षीको अवरोधपछि एक घण्टाका लागि स्थगित गरिएको छ ।
विपक्षीले प्रधानमन्त्रीको जवाफ मागिरहेको बेलामा प्रधानमन्त्रीले हिजो एक कार्यक्रममा ‘एउटा कर्मचारीलाई हटाएर, अर्को राखियो सकियो’ भनेका थिए । प्रधानमन्त्रीको यो भनाइले विपक्षीहरू झन् बिच्किएका छन् ।
प्रकाशित मिति: २०८१ चैत्र १४, बिहिवार १३:१७
