विराटनगर, असार २ । इजरायल भ्रमणमा रहेका विराटनगर महानगरका मेयर नागेश कोइराला उत्तै फसेका छन ।
इजरायलमा विकास भएको खेती प्रणालीको अवलोकन गर्न सात दिन अघि इजरायल पुगेका मेयर नागेश कोइराला इरान र इजरायलबीचको युद्ध चर्किएपछि इजरायलमा फसेका हुन ।
उनी इजरायलको राजधानी भन्दा ३० किलोमिटर पर सेफाइ भन्ने सहरमा रहेका छन् । इजरायल सरकारको निम्तोमा उनी इजरायल गएको उनको सचिवालयले जनाएको छ । कोइराला जुन २० मा फर्कने कार्यक्रम थियो ।
इरानसँग युद्ध चर्किएपछि नेपाल फर्कन अनिश्चित भएको मेयर कोइरालाले बताए । उनका अनुसार उनी इजरायलको सहकारी अभ्यासबारे अध्ययनका लागि इजरायली निम्तोमा सात दिन अघि त्यहाँ पुगेका थिए । सो कार्यक्रममा इजरायल पुग्ने कोइराला एक्ला नेपाली सहभागी हुन् । उनले फिलिपिन्स लगायतका देशबाट अन्य सहभागी कार्यक्रममा गएको बताए ।
युद्ध चर्किएपछि अहिले इजरायलका विमानस्थलहरू बन्द रहेका छन् । विमानस्थल बन्द भएका कारण नेपाल फिर्ती अनिश्चित बनेको मेयर कोइरालाले बताए ।
केही दिनयता इजरायल र इरानबिच आक्रमण र प्रत्याक्रमण चल्न थालेपछि इजरायल भ्रमणमा रहेका उनीसहित विश्वका विभिन्न देशका जनप्रतिनिधिहरू बङ्करमा लुक्दै बस्न बाध्य भएका छन् ।
मेयर कोइरालाले आफू सेफाइ भन्ने ठाउँमा सुरक्षित रहेको जानकारी दिएका छन् । कोइरालाले आफू सहितको टोलीमा फिलिपिन्सका दुई सांसदसहित १७ जना जनप्रतिनिधिहरू रहेको बताए ।
यहाँ बेलाबेला साइरन बजिरहँदो रहेछ’, कोइरालाले भने ‘इरानले बम या अरू कुनै आक्रमण गर्न लाग्दा साइरन बजेपछि डेढ मिनेटभित्र बङ्करभित्र छिरिसक्नुपर्ने रहेछ ।
प्रकाशित मिति: २०८२ असार २, सोमवार ०८:४७
