काठमाडौं, असार १० । प्रधानमन्त्री निवास बालुवाटारमा मंगलबार सत्तारुढ गठबन्धनमा आवद्ध दलका शीर्ष नेताहरूको बैठक जारी रहेको छ। राष्ट्रिय राजनीतिक परिस्थिति, आगामी संसदको कार्यसूची, बजेट कार्यान्वयन, प्रदेश सरकारको समन्वय तथा सत्तारुढ गठबन्धनबीचको आपसी समझदारीलाई सुदृढ गर्ने विषयमा बैठक केन्द्रित भएको जनाइएको छ।

बैठकमा प्रधानमन्त्री एवं नेकपा (एमाले) अध्यक्ष केपी शर्मा ओली, नेपाली कांग्रेसका सभापति शेरबहादुर देउवा, लोकतान्त्रिक समाजवादी पार्टी (लोसपा) का अध्यक्ष महन्थ ठाकुर, नागरिक उन्मुक्ति पार्टीकी अध्यक्ष रञ्जिता श्रेष्ठ, र जनमत पार्टीका अध्यक्ष डा. सीके राउतलगायत प्रमुख नेताहरूको उपस्थिति रहेको छ।

बैठकको मुख्य एजेण्डा अहिले संसदमा प्रस्तुत भएको आर्थिक वर्ष २०८२/८३ को विनियोजन विधेयक पारित गर्न आवश्यक रणनीति तय गर्नु रहेको बताइएको छ । प्रधानमन्त्री ओली नेतृत्वको सरकारले संसदमा पेस गरेको बजेटलाई सहज रूपमा पारित गराउन सत्ता पक्षका दलहरूबीच आवश्यक समन्वय र समर्थन सुनिश्चित गर्ने तयारी भइरहेको छ।

स्रोतका अनुसार, केही दलहरूले बजेटमा प्रदेश र स्थानीय तहका माग समेटिएको छैन भन्दै असन्तुष्टि जनाएका छन् । बालुवाटारमा बैठक जारी मार्फत तिनको चित्त बुझाउने र साझा धारणा बनाउन खोजिएको बताइएको छ ।

बैठकमा सरकारको आगामी नीति तथा कार्यक्रम, गठबन्धनमा रहेका दलबीचको शक्ति सन्तुलन, मन्त्रालय बाँडफाँट तथा मन्त्रीपरिषद् विस्तारसम्बन्धी विषय पनि उठान भएको स्रोतले जनाएको छ। केही साना दलहरूले आफ्ना माग पुरा नभएको भन्दै असन्तुष्टि जनाएपछि प्रधानमन्त्री ओलीले साझा सहमति बनाउने उद्देश्यले बैठक आह्वान गरेका छन्।

यस्तै, संघीयता, समावेशिता र विकासका एजेण्डालाई केन्द्रमा राखेर सरकारले अघि बढाउने नीति निर्माणमा सल्लाह भइरहेको छ। यसै क्रममा, विभिन्न दलबीच हुने आगामी राजनीतिक सहकार्य र संभावित संयुक्त अभियानबारे समेत बैठकमा छलफल भइरहेको जनाइएको छ।

सत्तारुढ गठबन्धनमा आवद्ध दलहरूबीच हालसालै देखिएको असमझदारीलाई अन्त्य गरी आगामी राजनीतिक चुनौतीहरूलाई मिलेर सामना गर्नुपर्ने साझा धारणा बनाउने प्रयासका रूपमा पनि यो बैठक हेरिएको छ। स्थानीय, प्रदेश र संघीय सरकारबीचको समन्वय, बजेट कार्यान्वयन र सेवा प्रवाहमा देखिएको बाधालाई हल गर्न यो बैठक निर्णायक बन्ने अपेक्षा गरिएको छ।

बैठक जारी रहेको र अन्तिम निष्कर्ष आइसकेको छैन। बैठकपछि संयुक्त प्रेस विज्ञप्ति वा पत्रकार सम्मेलनमार्फत औपचारिक निर्णय सार्वजनिक गरिने बताइएको छ। सत्ता पक्षीय गठबन्धनको यो बैठक आगामी राजनीतिक दिशानिर्देशन तय गर्ने दृष्टिले महत्त्वपूर्ण मानिएको छ।