काठमाडौं, असार ११ । नेकपा एमालेको सचिवालय बैठक बस्दै छ । बैठक दिउँसो १ बजे सचिवालय बैठक बस्दै छ । ललितपुरको च्यासलस्थित पार्टी केन्द्रीय कार्यालयमा बस्ने तयारी गरिएको हो । बैठकमा पार्टीको आसन्न विधान महाधिवेशन र समसामयिक राजनीतिक घटनाक्रमबारे विस्तृत छलफल हुने एमालेले जनाएको छ ।

एमाले केन्द्रीय कार्यालयका सचिव डा. भीष्म अधिकारीका अनुसार बैठकमा मुख्यरूपमा आगामी भदौ २० देखि २२ गतेसम्म ललितपुरको गोदावरीस्थित सनराइज सम्मेलन केन्द्रमा आयोजना गरिने विधान महाधिवेशनको तयारीमाथि गहन छलफल हुनेछ । उक्त महाधिवेशन पार्टीको विधान संशोधन, सांगठनिक सुदृढीकरण र भावी रणनीति तय गर्ने दृष्टिकोणले अत्यन्त महत्वपूर्ण हुने बताइएको छ ।

महाधिवेशनका लागि विभिन्न समितिहरू गठन भइसकेका छन् भने सांगठनिक दस्तावेज, विधान संशोधन प्रस्ताव लगायतका तयारी तीव्र पारिएको जानकारी अधिकारीले दिए । बैठकमा विधान महाधिवेशनमा प्रस्तुत गरिने प्रस्तावहरू, प्रतिनिधि चयनको प्रक्रिया, सहभागिता र व्यवस्थापनका पक्षमा पनि निर्णयहरू लिने सम्भावना छ ।

सचिवालय बैठकमा देशको समसामयिक राजनीतिक अवस्था, सरकारको कामकारबाही, संसद्को भूमिका, स्थानीय तहको अवस्था लगायतका विषयमा पनि पार्टीको धारणा तय गरिने एमालेले जनाएको छ । साथै आगामी निर्वाचनका सन्दर्भमा पार्टीको तयारी र सम्भावित गठबन्धनबारे पनि प्रारम्भिक छलफल हुने अनुमान गरिएको छ ।

पार्टी अध्यक्ष केपी शर्मा ओलीको अध्यक्षतामा बस्ने बैठकमा वरिष्ठ नेता, उपाध्यक्ष, महासचिव, सचिवसहित सचिवालय सदस्यहरू सहभागी हुने छन् । एमालेको यो बैठक पार्टीभित्रको आन्तरिक नीति तथा भावी दिशा निर्धारणको दृष्टिले पनि महत्वपूर्ण हुने विश्लेषण गरिँदैछ ।