एजेन्सी, असार २४ । बिहारको पूर्णियामा सोमबार बोक्सीको आरोपमा एकै परिवारका पाँच जनालाई जिउँदै जलाएर निर्ममतापूर्वक हत्या गरिएको भयानक घटना सार्वजनिक भएको छ ।
पूर्णिया जिल्लाको मुफस्सिल प्रहरी चौकी क्षेत्रको तेटगामा गाउँमा अभियुक्तहरुले बोक्सीको आरोपमा उनिहरुलाई जिउदै जलाएको हो । घटनापछि सो क्षेत्रमा सनसनी फैलिए संगै अभियुक्तहरु फरार भएका छन । प्रहरीले उनीहरूको खोजी गरिरहेको छ ।
गाउँका रामदेव ओराँवको छोराको तीन दिन अघि भूत–प्रेत र स्वदेशी उपचारको क्रममा मृत्यु भएको थियो र दोस्रो छोराको स्वास्थ्य पनि बिग्रँदै गएको थियो। यसपछि, गाउँलेहरूले यस परिवारलाई यो मृत्युको लागि जिम्मेवार ठहराउँदै उनीहरूलाई ’बोक्सी’ भएको आरोप लगाउँदै पहिले कुटपिट गरे र त्यसपछि उनीहरूलाई आगो लगाए र जिउँदै जलाएर निर्ममतापूर्वक हत्या गरेका छन ।
मृतकहरूको पहिचान बाबुलाल ओराँव, सीता देवी, मनजित ओराँव, रनिया देवी र तपातो मोस्मतको रूपमा गरिएको छ । तिनीहरू सबै एकै परिवारका सदस्य थिए । यो भयानक घटनापछि गाउँमा आतंकको वातावरण छ । धेरै गाउँलेहरू डरले घर छोडेर निस्केका छन् ।
एक अभियुक्त पक्राउ
घटनाको जानकारी पाउने बित्तिकै प्रहरी घटनास्थलमा पुगेर अनुसन्धान सुरु गरेको छ । घटनास्थलमा अनुसन्धानका लागि कुकुर टोली र फोरेन्सिक टोली समेत परिचालन गरिएको प्रहरीले जनाएको छ। हालसम्म यस घटनामा नकुल कुमार नामक एक अभियुक्तलाई पक्राउ गरिएको छ, जसमाथि गाउँलेहरूलाई उक्साएको र परिवारलाई आगो लगाउन उक्साएको आरोप छ ।
यस परिवारका एक मात्र जीवित सदस्य ललितले घटना सुनाउँदै भने कि गाउँलेहरूले पहिले सम्पूर्ण परिवारलाई बोक्सी भएको आरोप लगाउँदै कुटपिट गरे र त्यसपछि जिउँदै आगो लगाइदिए। ललित कुनै न कुनै रूपमा त्यहाँबाट भागेर आफ्नो ज्यान बचाउन सफल भए । उनले भने कि जलेको शव पछि पानीमा फ्याँकिएको थियो । ललित अझै पनि घटनाको बारेमा स्तब्ध छन्, जबकि प्रहरीले अन्य अभियुक्तहरूको खोजी गरिरहेको छ।
यो घटनाले कानून व्यवस्थामा प्रश्न उठाउने मात्र होइन, अन्धविश्वासले व्यक्तिलाई कति हदसम्म राक्षसमा परिणत गर्न सक्छ भनेर पनि देखाउँछ।
प्रकाशित मिति: २०८२ असार २४, मंगलवार ०७:१०
