काठमाडौं, साउन २ । राष्ट्रिय प्रजातन्त्र पार्टी (राप्रपा) ले आज शुक्रबार अख्तियार दुरुपयोग अनुसन्धान आयोगमा औपचारिक रूपमा ज्ञापन पत्र बुझाउँदैछ। पार्टी अध्यक्ष राजेन्द्र लिङ्देनको नेतृत्वमा दिउँसो टंगालस्थित अख्तियारको केन्द्रीय कार्यालयमा सो ज्ञापनपत्र बुझाइनेछ।

राप्रपाले देशभर भ्रष्टाचारविरुद्ध जनचेतना र दबाब सिर्जना गर्न सशक्त अभियान सुरु गर्ने निर्णय गरेको हो। यसअघि असार १९ गते सम्पन्न पार्टीको केन्द्रीय कार्यसम्पादन समिति बैठकले भ्रष्टाचारविरुद्ध चरणबद्ध आन्दोलन र दबाबमूलक कार्यक्रम सञ्चालन गर्ने निर्णय गरेको थियो।

राप्रपाका अनुसार, भ्रष्टाचार नियन्त्रणका लागि गठित सरकारी निकायहरू आफैं कमजोर बनेका छन्। पार्टीले अख्तियार मात्र नभई प्रदेश कार्यालयहरू, सम्पत्ति शुद्धीकरण विभाग तथा अन्य सरोकारवाला निकायहरूमा समेत ज्ञापनपत्र बुझाउँदै भ्रष्टाचार नियन्त्रणको माग गर्दै जनदबाब सिर्जना गर्ने तयारी गरेको छ।

पार्टीका प्रवक्ता भुवन पाठकका अनुसार, ‘देशको वर्तमान अवस्था गम्भीर छ। शासनमा रहेका व्यक्तिहरूको संलग्नतामा ठूला भ्रष्टाचारका घटना सार्वजनिक भइरहेका छन् तर कानुनी कारबाही शून्यप्रायः छ। हामी निष्क्रिय संस्थाहरूलाई सक्रिय बनाउने अभियानमा जुटेका हौं।’

राप्रपाले भ्रष्टाचारलाई देशको समृद्धिमा मुख्य बाधक मानेको छ। सोही कारणले अबको रणनीतिक प्राथमिकता नै संस्थागत सुधार र जनउत्तरदायित्व सुनिश्चित गर्ने भएको जनाइएको छ। पार्टीले सबै तह र तप्कामा रहेको भ्रष्टाचारको अन्त्यका लागि नागरिक स्तरमै चेतना र दबाब विस्तार गर्न देशव्यापी अभियान सञ्चालन गर्ने स्पष्ट पारेको छ।

यस अभियानअन्तर्गत, पार्टीले विभिन्न सरकारी कार्यालयहरूमा ज्ञापनपत्र बुझाउनुका साथै सडक आन्दोलन, जनसभा, बहस तथा कानुनी प्रक्रिया समेत अघि बढाउने योजना बनाएको छ।

राप्रपाको यो कदमलाई कतिपयले विपक्षी भूमिकामा जनउत्तरदायी दबाब सिर्जना गर्न गरिएको सकारात्मक प्रयासका रूपमा हेरेका छन् भने कतिपयले यसलाई राजनीतिक एजेन्डा विस्तारको तयारी पनि मानेका छन्।

भ्रष्टाचारविरुद्धको यस अभियानमा राप्रपाले सर्वसाधारण, पेशागत संघ–संस्था तथा नागरिक समाजसँग पनि सहकार्य गर्दै जाने बताएको छ।