एजेन्सी , साउन २२ । अमेरिकी राष्ट्रपति डोनाल्ड ट्रम्पले छिट्टै रूसी राष्ट्रपति भ्लादिमिर पुतिनसँग प्रत्यक्ष भेटवार्ता हुने बताएका छन् । उक्त घोषणा मस्कोमा ट्रम्पका विशेष दूत र पुतिनबीच सफल वार्ता सम्पन्न भएपछि आएको हो । ट्रम्पले युक्रेनी राष्ट्रपति वोलोदिमिर जेलेंस्कीसँग पनि टेलिफोन संवाद गर्दै युक्रेन–रुस युद्ध अन्त्य गर्ने दिशामा ठूला कदमहरू उठाउने प्रतिबद्धता जनाएका छन्।
बुधबार पत्रकारहरूसँग कुरा गर्दै ट्रम्पले भने, “धेरै चाँडै पुतिन र जेलेंस्कीसँग भेटको राम्रो अवसर छ। युद्ध अन्त्यतर्फ ठोस प्रगति गर्न सकिन्छ।” तर, उनले पुतिनसँगको सम्भावित भेट कहाँ हुने भन्ने खुलासा गरेका छैनन्।
न्यूयोर्क टाइम्स र सीएनएनका अनुसार, ट्रम्पले अर्को साता पुतिनसँग भेट गर्ने तयारी गरेका छन् र त्यसपछि जेलेंस्कीसँग पनि प्रत्यक्ष वार्ता गर्ने चाहना राख्छन्।
युक्रेन युद्ध अन्त्यका लागि ट्रम्पले आफ्नो ट्रुथ सोसल प्लेटफर्ममा लेख्दै भनेका छन्, “ठूलो प्रगति भएको छ!” ट्रम्पले युक्रेन–रुस विवाद समाधानतर्फ शान्तिपूर्ण पहल गरिरहेका छन् भने, यदि आगामी शुक्रबारसम्म शान्ति प्रक्रिया सुरु भएन भने रुसमाथि नयाँ प्रतिबन्धहरू लगाइने चेतावनीसमेत दिएका छन्।
मस्कोमा ट्रम्पका विशेष दूत स्टीव विटकॉफले रूसी नेतृत्वसँग गरेको भेटलाई क्रेमलिनले सफल वार्ता भनेको छ। यिनै छलफलहरूका आधारमा अब दुई राष्ट्रप्रमुखहरूबीच प्रत्यक्ष संवादको सम्भावना देखिएको हो।
ट्रम्प र जेलेंस्कीबीचको फोनवार्तामा नाटो प्रमुख, साथै बेलायत, जर्मनी र फिनल्यान्डका नेताहरू पनि सहभागी रहेको जानकारी आएको छ। यसले अन्तर्राष्ट्रिय समुदायको चासो र समर्थन पनि शान्ति प्रक्रियामा रहेको संकेत दिन्छ।
रुस–युक्रेन युद्धले दुई वर्ष नाघ्दा पनि समाधानको बाटो नखुलेको अवस्थामा ट्रम्पको सक्रिय हस्तक्षेपलाई संभावित मोडको रूपमा हेरिएको छ। राजनीतिक विश्लेषकहरूका अनुसार, यदि ट्रम्प पुतिन र जेलेंस्की दुवैसँग प्रत्यक्ष छलफल गर्न सफल भएमा युद्ध अन्त्यतर्फ ठोस प्रगति सम्भव हुन सक्छ।
प्रकाशित मिति: २०८२ श्रावण २२, बिहीबार ०८:५०
