एजेन्सी
पटना, साउन २५ । राष्ट्रिय जनता दल (राजद)का नेता तथा बिहारका पूर्व उपमुख्यमन्त्री तेजस्वी यादवले आफ्नो नाममा दुई वटा मतदाता परिचयपत्र (ईपिक) भएको विवादमा निर्वाचन आयोगलाई लिखित जवाफ पठाएका छन् । शनिबार राजदका मुख्य प्रवक्ता प्रो. मनोज झाले पत्रकारलाई जानकारी दिँदै भने, आयोगलाई जवाफ पुगेको छ, तर यसको विवरण सार्वजनिक गर्न भने अस्वीकार गरे।

मनोज झाले निर्वाचन आयोगलाई प्रणालीगत त्रुटि सच्याउन आग्रह गरे। उनका अनुसार, देशभरमा दुई ईपिकको सयौँ उदाहरण भेटिएका छन्, तर आयोगले यस विषयमा अहंकारपूर्ण व्यवहार गरिरहेको छ। उनले टिप्पणी गर्दै भने, “अहंकार त्यतिबेला मात्र उचित हुन्छ, जब तपाईंसँग बुद्धि र संवेदनशीलता दुवै हुन्छन्। निर्वाचन आयोगले अज्ञान र अहंकारबाट मुक्त हुनुपर्छ।”

तेजस्वी यादवलाई निर्वाचन आयोगले यस मुद्दामा यो तेस्रो पटक नोटिस पठाएको हो। निर्वाचक दर्ता अधिकृत तथा पटना सदरका अनुमण्डल पदाधिकारीले उनलाई १६ अगस्टसम्म जवाफ दिन निर्देशन दिएका थिए। यसअघि, आयोगले पहिलो पटक ३ मेमा नोटिस पठाउँदै तेजस्वीले पत्रकार सम्मेलनमा देखाएको दोस्रो ईपिक (आरएबी १६१२०) जाँचका लागि मागेको थियो। आयोगका अनुसार तेजस्वीको आधिकारिक ईपिक नम्बर (आरएबी ०४५६२२८) हो, र दोस्रो नम्बरको ईपिक आधिकारिक रूपमा जारी नभएको देखिन्छ।

यसअघि तेजस्वीले प्रारम्भिक मतदाता सूचीमा आफ्नो नाम नरहेको दाबी गरेका थिए, तर आयोगले उनको यो दाबीलाई खारेज गरेको थियो। दोस्रो पटक नोटिस पाएपछि तेजस्वीले प्रतिक्रिया दिँदै भनेका थिए, “हामी जवाफ त दिनेछौं, तर त्यसपछि आयोगसँग कुनै उत्तर रहने छैन।” ८ अगस्टमा उनलाई तेस्रो पटक नोटिस पठाइएको थियो।

अब आयोगले तेजस्वीको लिखित जवाफबारे निर्णय गर्न बाँकी छ। मनोज झाले चेतावनी दिँदै भने, “निर्वाचन आयोगले आफ्ना अघिल्ला प्रमुख आयुक्तहरूबाट सिक्नुपर्छ, नभए भारतमा पनि आयोगको हालत बांग्लादेशको निर्वाचन आयोगजस्तै हुनेछ।”

यो विवादले बिहारको राजनीतिक वृतमा नयाँ चर्चा सुरु गराएको छ। राजद यसलाई निर्वाचन प्रणालीको गम्भीर कमजोरीको प्रमाणका रूपमा प्रस्तुत गर्दैछ भने, आयोग यसलाई कानुनी र प्रशासनिक मुद्दा मान्दै छानबिनमा केन्द्रित देखिन्छ।