एजेन्सी, भदौ ७ । भारतका केन्द्रीय मन्त्री तथा लोक जनशक्ति पार्टी (रामविलास)का अध्यक्ष चिराग पासवानले विपक्षमाथि प्रहार गर्दै प्रधानमन्त्री नरेन्द्र मोदीको खुला प्रशंसा गरेका छन्।

शुक्रबार पटनामा आयोजित पत्रकार सम्मेलनमा पासवानले भने, “प्रधानमन्त्री नरेन्द्र मोदी लगातार बिहार आउनु नै प्रमाण हो कि बिहार उनीहरूको प्राथमिकतामा छ।” उनका अनुसार मोदीले चुनावका बेला गरेका वाचा पूरा गरिरहेका छन् र यसबाट बिहार निरन्तर लाभान्वित भइरहेको छ । उनले विपक्षी दलहरूलाई कटाक्ष गर्दै भने कि आज मुद्दाविहीन भएका कारण ती दलहरूले प्रधानमन्त्रीको यात्रामाथि प्रश्न उठाइरहेका छन्।

पासवानले विशेष गरी राजद प्रमुख लालु प्रसाद यादवको हालैको अभिव्यक्तिप्रति आपत्ति जनाए । लालुले भनेका थिए कि मोदी बिहारमा नीतीश कुमार र उनको पार्टीको “पिण्डदान” गर्न आएका हुन् । यसबारे चिरागले भने, “राजनीतिमा विचार र नीतिमाथि बहस हुनुपर्छ, तर यस किसिमको अपमानजनक भाषा प्रयोग गर्न ठाउँ छैन।”

चिराग पासवानले राजद–कांग्रेस गठबन्धनमाथि समेत टिप्पणी गरे। उनका अनुसार आजको राजद आफ्नै हैसियत गुमाएर कांग्रेसको पछि लाग्न बाध्य भएको छ। उनले तेजस्वी यादवको त्यो अभिव्यक्तिमाथि व्यंग्य गरे जसमा राहुल गान्धीलाई प्रधानमन्त्री पदका उम्मेदवारका रूपमा प्रोजेक्ट गरिएको थियो। चिरागले भने, “जस कांग्रेसको देशभर कुनै ठोस जनाधार छैन, त्यही पार्टी अहिले बिहारमा राजदको सहारा बनेको छ। एक समय शक्तिशाली रहेको राजदका लागि यो अवस्था लाजमर्दो हो।”

पत्रकार सम्मेलनमा चिराग पासवानले युनियन टेरिटरी बिलबारे पनि आफ्नो धारणा राखे। उनले राजद र कांग्रेसलाई लक्षित गर्दै भने, “भ्रष्टाचारको इतिहास बोकेका दलहरूले यस विधेयकको विरोध गर्नु कुनै आश्चर्यको कुरा होइन। यी दलहरूको उद्देश्य जनहित होइन, केवल सत्ता कब्जा र आफ्नो राजनीतिक अस्तित्व जोगाउनु मात्र हो।”

चिरागले विपक्षी दलहरूको राजनीति स्वार्थमुखी भएको आरोप लगाए। उनका अनुसार यी दलहरू विकास र योजनामा होइन, केवल सत्तामा ध्यान केन्द्रित गरिरहेका छन्। उनले प्रधानमन्त्री मोदीले जनताको विश्वास जित्ने किसिमले काम गरिरहेको दाबी गर्दै भने, “आजको बिहारले केन्द्र सरकारका योजनाबाट प्रत्यक्ष लाभ पाइरहेको छ, त्यसैले जनताले भ्रममा नपरी यथार्थ हेर्नुपर्छ।”

चिराग पासवानको वक्तव्यले बिहारको राजनीतिक माहोल फेरि तातिएको छ। मोदीको प्रशंसा र राजद–कांग्रेस गठबन्धनमाथि गरिएको तीखा प्रहार अब विपक्षले कस्तो जवाफ दिन्छ भन्ने प्रतीक्षा राजनीतिक वृत्तमा भइरहेको छ।