काठमाडौं, भदौ १० । नेकपा (एमाले)ले ललितपुरको गोदावरीमा हुने दोस्रो विधान महाधिवेशनका लागि मुख्य नारा तय गरेको छ। प्रचार विभाग प्रमुख राजेन्द्र गौतमका अनुसार महाधिवेशनको नारा “निर्णायक राष्ट्रिय शक्ति निर्माण हाम्रो संकल्प, समृद्ध नेपाल सुखी नेपाली राष्ट्रिय गन्तव्य” रहनेछ।

उनका अनुसार यो नारा पार्टीको राजनीतिक प्रतिवेदनमार्फत औपचारिक रूपमा टुंगो लगाइएको हो। नारा तय भए पनि महाधिवेशनको आधिकारिक लोगो भने अझै बाँकी रहेको जानकारी गराइएको छ।

आसन्न विधानअधिवेशनलाई सफल बनाउन एमालेले विभिन्न उपसमिति गठन गरी जिम्मेवारी बाँडफाँड गरेको छ। प्रतिनिधि व्यवस्थापनको नेतृत्व संगठन विभाग प्रमुख काशीनाथ अधिकारीले गरिरहेका छन्।

आवास व्यवस्थापनको जिम्मा वरिष्ठ नेता लालबाबु पण्डितलाई दिइएको छ। यद्यपि पार्टीले प्रतिनिधिहरूलाई निःशुल्क आवासको व्यवस्था नगर्ने निर्णय गरेको छ। प्रतिनिधिहरूले आफ्नै खर्चमा आवास मिलाउनु पर्नेछ। तर, जसले आफैं व्यवस्था गर्न नसक्नेछन्, तिनीहरूका लागि लालबाबुको संयोजनमा आवश्यक सहयोग उपलब्ध गराइनेछ। खाद्य तथा सचिवालय व्यवस्थापनको जिम्मा भिष्म अधिकारीलाई दिइएको छ।

प्रचार तथा प्रकाशन उपसमितिको संयोजनमा राजेन्द्र गौतम स्वयं छन्। मञ्च व्यवस्थापन विनोद श्रेष्ठको संयोजनमा हुनेछ। स्वास्थ्य व्यवस्थापन कृष्णगोपाल श्रेष्ठले सम्हाल्नेछन्। स्वयंसेवक व्यवस्थापन भानुभक्त ढकालको नेतृत्वमा हुनेछ भने सांस्कृतिक कार्यक्रम फाँटको संयोजन हेमराज राईले गरिरहेका छन्।

पार्टी नेतृत्वले तय गरेको नारा एमालेलाई राष्ट्रिय निर्णायक शक्तिका रूपमा प्रस्तुत गर्ने रणनीतिको हिस्सा भएको विश्लेषकहरूको भनाइ छ। पार्टी अध्यक्ष केपी शर्मा ओलीले नेतृत्व गरिरहेको महाधिवेशनमा संगठन संरचना, विधान संशोधन, भावी रणनीति र नीतिगत निर्णयहरूमा व्यापक छलफल हुने बताइएको छ।

महाधिवेशनमा करिब ३,००० भन्दा बढी प्रतिनिधिहरू सहभागी हुने अनुमान छ। आवास, यातायात, स्वास्थ्य र सुरक्षा व्यवस्थापनलाई ध्यानमा राखी आवश्यक तयारी तीव्र बनाइएको एमाले स्रोतले जनाएको छ।

राजनीतिक रूपमा एमालेले यो महाधिवेशनलाई शक्तिप्रदर्शनको अवसरका रूपमा पनि लिएको छ। नारा–“समृद्ध नेपाल, सुखी नेपाली”–प्रत्यक्ष रूपमा ओली सरकारले अघि सारेको राष्ट्रिय दृष्टिकोणसँग जोडिएको छ। यसरी, महाधिवेशनमार्फत पार्टीले फेरि जनतालाई राष्ट्रनिर्माण र स्थिरताप्रतिको आफ्नो संकल्प देखाउने अपेक्षा गरिएको छ।

ललितपुरको गोदावरीमा हुन लागेको दोस्रो विधान महाधिवेशन एमालेका लागि संगठन सुदृढीकरण मात्र नभई भावी राजनीतिक यात्राको दिशानिर्देश गर्ने महत्वपूर्ण क्षण हुने देखिन्छ। नारा तय भएपछि अब बाँकी तयारीलाई अन्तिम चरणमा पुर्‍याउन सबै उपसमितिहरू सक्रिय भएका छन्।