काठमाडौं , भदौ ३१। जेनजी आन्दोलनपछि नेकपा माओवादी केन्द्रका अध्यक्ष पहिलो चोटी सार्वजनिक भएका छन । आन्दोलनकारीले लगाएको आगोको कारण ध्वस्त भएको पार्टी कार्यालय निरिक्षण गर्न पुगेका प्रचण्डले नयाँ र भव्य पार्टी केन्द्रीय कार्यालय बनाउने घोषणा गरेका छन ।
आज पार्टी केन्द्रीय कार्यालय अनुगमन गरेपछि प्रचण्डले भने, ‘क्षति त पुर्याइयो, पुग्यो, तर म के भन्न चाहन्छु भने अब पार्टीको नयाँ कार्यालय भवन सिंगो पार्टीपंक्ति, देशभित्र र बाहिरका सबै पार्टी सदस्यहरुको सहयोगमा भव्य भवन बनाइने छ ।’ पार्टी कार्यालय कहाँ बनाउने भनेर उनले खुलाएनन् ।
अवलोकनपछि उनले बैठकका माइन्युट, पुस्तकालय र केही कम्प्युटरहरु जोगिएको बताए । ती जोगाउन भूमिका खेलेको भन्दै उनले कर्मचारी र कार्यकर्ताहरुलाई धन्यवाद दिए ।
जेनजी आन्दोलन प्रचण्ड सार्वजनिक भएको आज पहिलोपटक हो । उनलाई सेनाले सुरक्षा दिएर राखेको थियो । केही दिनअघि मात्रै सेनाको ब्यारेकबाट बाहिर आएका उनी आफन्तको घरमा बस्दै आएका छन् ।
जेनजी प्रदर्शनको क्रममा प्रचण्ड बस्दै आएको खुमलटारस्थित निवासमा पनि आगजनी भएको छ । उनका छोरीहरु गंगा र रेनुसहित पार्टीका अरु नेताहरुको घरमा पनि आगजनी र तोडफोड भएको छ ।
आज पार्टी कार्यालय पुगेर प्रचण्डले सरसफाइमा सहभागी कार्यकर्ताहरुलाई केहीबेर साथ दिएका थिए । त्यसपछि शहीद स्तम्भमा माल्यार्पण गरेका थिए ।
प्रकाशित मिति: २०८२ भाद्र ३१, मंगलवार १३:३६
