जनकपुरधाम, मंसिर १० । भारत र श्रीलंकाको संयुक्त आयोजना रहने आईसीसी टी-२० विश्वकप क्रिकेट प्रतियोगिताको खेल तालिका अन्तर्राष्ट्रिय क्रिकेट परिषद् (आईसीसी) ले सार्वजनिक गरेको छ। तालिका अनुसार नेपाल समूह ‘सी’ मा परेको छ र आफ्नो पहिलो खेलमा इंग्ल्यान्डसँग प्रतिस्पर्धा गर्नेछ।
नेपाल र इंग्ल्यान्डबीचको पहिलो खेल फेब्रुअरी ८ मा भारतको मुम्बईमा हुनेछ। त्यसपछि दोस्रो खेलमा नेपालले फेब्रुअरी १२ मा इटालीसँग भिड्नेछ भने तेस्रो खेलमा फेब्रुअरी १५ मा वेस्ट इन्डिजसँग प्रतिस्पर्धा गर्नेछ। लिग चरणको आफ्नो अन्तिम अर्थात् चौथो खेलमा नेपालले फेब्रुअरी १७ मा बंगलादेशसँग सामना गर्ने तालिका छ। यी चारै खेल भारतको मुम्बईमा आयोजना हुनेछन्।
समूह ‘सी’ मा नेपालसँगै इंग्ल्यान्ड, वेस्ट इन्डिज, बंगलादेश र इटाली रहेका छन्। यी सबै टोलीहरूबीच कडा प्रतिस्पर्धा हुने अपेक्षा गरिएको छ। विशेषगरी इंग्ल्यान्ड र वेस्ट इन्डिज अन्तर्राष्ट्रिय क्रिकेटमा बलिया टोली मानिने भएकाले नेपालका लागि चुनौतीपूर्ण रहने देखिएको छ। यद्यपि पछिल्ला प्रतियोगिताहरूमा नेपाली टोलीले देखाएको सुधारिएको प्रदर्शनले समर्थकहरू उत्साहित बनेका छन्।
यसपटकको टी–२० विश्वकपको उद्घाटन खेल फेब्रुअरी ७ मा पाकिस्तान र नेदरल्यान्ड्सबीच हुनेछ। उक्त खेल श्रीलंकाको कोलोम्बोमा आयोजना हुनेछ।
आईसीसीले सार्वजनिक गरेको तालिकापछि विश्वभरका क्रिकेट समर्थकहरू उत्साहित बनेका छन्। नेपालमा पनि क्रिकेटप्रेमीहरू नेपाली टोलीको उत्कृष्ट प्रदर्शनको अपेक्षामा रहेका छन्। विश्वकपमा राम्रो प्रदर्शन गर्दै अर्को चरणमा पुग्ने लक्ष्य नेपाली टोलीको रहेको छ।
प्रकाशित मिति: २०८२ मंसिर १०, बुधबार ०७:१२
