काठमाडौं , पुस २ । नेकपा (एमाले) को ११औँ राष्ट्रिय महाधिवेशन अन्तर्गत जारी निर्वाचनमा हालसम्म ४१५ मत खसेको छ। राजधानी काठमाडौंको भृकुटीमण्डपमा भइरहेको मतदानमा कुल २२६३ जना मतदाता सहभागी हुने व्यवस्था गरिएको छ।
एमाले नेता सानुराज पोखरेलका अनुसार बिहानको तुलनामा मतदान केही सुस्त गतिमा अघि बढिरहेको छ। मतदान स्थलमा प्रतिनिधिहरू आ–आफ्नो प्यानलका उम्मेदवारका पक्षमा मत हालिरहेका छन्।
भित्र मतदान हुँदै गर्दा बाहिर नेता तथा कार्यकर्ताहरू आफ्ना प्यानलका उम्मेदवारहरूको प्रचारप्रसार गरिरहेका छन्। उनीहरूले प्रतिनिधिहरूलाई आ–आफ्नो पक्षमा भोट हाल्न आग्रह गरिरहेका छन्।
पार्टीभित्रको नेतृत्व चयनको लागि भएको यो निर्वाचनलाई निष्पक्ष र पारदर्शी बनाउन निर्वाचन आयोग र पार्टीले सुरक्षा तथा व्यवस्थापनका पर्याप्त उपायहरू अवलम्बन गरेको छ।
निर्वाचन पूरा भएपछि मतगणना तुरुन्तै सुरु हुने र केही घण्टाभित्र नतिजा सार्वजनिक हुने अपेक्षा गरिएको छ। एमालेको नयाँ नेतृत्वको घोषणा भएसँगै पार्टीको आगामी राजनीतिक रणनीति र कार्यशैलीमा नयाँ दिशा आउने विश्वास व्यक्त गरिएको छ।
भृकुटीमण्डपमा मतदान स्थल र आसपासको वातावरण शान्तिपूर्ण रहेको र सुरक्षा तथा व्यवस्थापनको जिम्मेवारी सुरक्षाकर्मीहरूले कुशलतापूर्वक सम्हालेको पार्टी स्रोतले जनाएका छन्।
प्रकाशित मिति: २०८२ पुष ३, बुधवार १४:०२
