काठमाडौं , पुस ६ । नेपाली कांग्रेसका सभापति शेरबहादुर देउवा लगायत शीर्ष नेताहरूले प्रतिनिधि सभा पुनर्स्थापनाको पक्षमा हस्ताक्षर नगरेका छन्।
निवर्तमान प्रमुख सचेतक श्यामकुमार घिमिरे र सचेतक सुशीला थिङसहितका सांसदहरूले प्रतिनिधि सभा पुनर्स्थापनाको पक्षमा सर्वोच्च अदालतमा रिट दिएका थिए। सोही रिटमा पक्ष कायम राख्न कांग्रेसका अन्य सांसदहरूले पनि हस्ताक्षर सुरु गरेका छन्।
संसदीय दलका स्रोतका अनुसार, कांग्रेसका निवर्तमान ८८ सांसदमध्ये आइतबार दिउँसोसम्म ६६ सांसदले हस्ताक्षर गरिसकेका छन्। तर सभापति देउवा, कार्यवाहक सभापति पूर्णबहादुर खड्का, महामन्त्री गगन थापा, विश्वप्रकाश शर्मा र नेता शेखर कोइराला लगायत शीर्ष नेताहरूले हस्ताक्षर गरेका छैनन्।
संसदीय दल स्रोतले भने, “निवर्तमान सांसद रहेका सभापति, कार्यवाहक सभापति र केही शीर्ष नेताहरूले हस्ताक्षर नगरे पनि बहुमत सांसदले प्रतिनिधि सभा पुनर्स्थापनाको पक्षमा समर्थन जारी राखेका छन्। हस्ताक्षर प्रक्रिया लगातार चलिरहेको छ।”
कांग्रेसले पछिल्लो केन्द्रीय समिति बैठकमा फागुन २१ को प्रतिनिधि सभा निर्वाचनमा भाग लिने निर्णय गरिसकेको थियो।
हस्ताक्षर संकलनको प्रक्रिया त्यतिबेला पनि जारी थियो, जब प्रमुख सचेतक घिमिरेको अगुवाइमा प्रतिनिधि सभा पुनर्स्थापनाका लागि हस्ताक्षर संकलन भइरहेको थियो। सो समयमा ४५ सांसदले हस्ताक्षर गरिसकेका थिए। तर सभापति देउवा उपचारका लागि सिंगापुरमा रहेका र कार्यवाहक सभापति खड्काले हस्ताक्षर संकलन रोक्दा शीर्ष नेताहरूले हस्ताक्षर नगरेको स्रोतले जनाएको छ।
यसरी कांग्रेसमा शीर्ष नेताहरूको हस्ताक्षर नभए पनि बहुमत सांसदहरूले प्रतिनिधि सभा पुनर्स्थापनाको पक्षमा आफ्नो समर्थन जारी राखेका छन्।
प्रकाशित मिति: २०८२ पुष ७, आइतवार १५:१५
