काठमाडौँ, पुस ११ । नेपाली कांग्रेसको विशेष महाधिवेशन को माग गर्ने पक्षधरले पार्टीलाई स्मरण पत्र बुझाएका छन्।
पार्टी भित्र नियमित महाधिवेशन सञ्चालनमा समस्या देखिएको भन्दै, पक्षधरहरूले कार्यवाहक सभापति पूर्णबहादुर खड्कालाई स्मरण पत्र बुझाएका हुन्। पार्टी नेता देवराज चालिसेले नियमित महाधिवेशन नहुँदा विशेष महाधिवेशनको विकल्प नभएको उल्लेख गर्दै स्मरण पत्र बुझाएको जानकारी दिएका छन्।
पूर्वनिर्धारित नियमित महाधिवेशनमा अलमल देखिएपछि कांग्रेसभित्रका केही समूहले देशव्यापी हस्ताक्षर अभियान सञ्चालन गरेका थिए। सो अभियान अन्तर्गत २९ असोजमा विशेष महाधिवेशनको माग गर्दै २४८८ प्रतिनिधिहरूको हस्ताक्षर कार्यवाहक सभापतिलाई बुझाइएको थियो।
स्मरण पत्रमार्फत पार्टीको नेतृत्व संरचना, महाधिवेशनको आयोजना र नेतृत्व परिवर्तन प्रक्रिया शीघ्रता साथ अघि बढाउन आग्रह गरिएको बताइएको छ। कांग्रेसभित्रको यो मागले आगामी निर्वाचन र पार्टीको नेतृत्वमा नयाँ राजनीतिक समीकरण आउन सक्ने संकेत दिएको छ।
विशेष महाधिवेशनको माग गर्ने समूहले पार्टीभित्र युवापुस्ता र नयाँ नेतृत्वलाई मौका दिनुपर्ने जोड दिएका छन्। यस अभियानले कांग्रेसभित्रको आन्तरिक लोकतान्त्रिक प्रक्रिया सुदृढ पार्ने र नेतृत्वमा पारदर्शिता सुनिश्चित गर्ने उद्देश्य राखेको छ।
पार्टी स्रोतका अनुसार स्मरण पत्रबारे कार्यवाहक सभापति खड्काको प्रतिक्रिया यसै साता सार्वजनिक हुने अपेक्षा गरिएको छ।
प्रकाशित मिति: २०८२ पुष १२, शुक्रवार १६:२५
