काठमाडौँ, पुस १२ । निर्वाचन आयोगले आगामी प्रतिनिधिसभा सदस्य निर्वाचन, २०८२ का लागि समानुपातिक निर्वाचन प्रणालीतर्फ उम्मेदवारको बन्दसूची तयार गर्न दर्ता भएका सबै राजनीतिक दलहरूलाई आग्रह गरेको छ। आयोगले दलहरूलाई विधिपूर्वक, रीतपूर्वक र आवश्यक कागजातसहित उम्मेदवारको सूची तयार गर्न निर्देशन दिएको छ।
निर्वाचन आयोगले प्रतिनिधिसभा सदस्य निर्वाचन ऐन, २०७४ को दफा २८, प्रतिनिधिसभा सदस्य निर्वाचन नियमावली, २०७४ को नियम १४ र प्रतिनिधिसभा समानुपातिक निर्वाचन निर्देशिका, २०८२ को दफा १३ बमोजिम बन्दसूची तयार गर्नुपर्ने स्पष्ट पारेको छ। तयार भएको बन्दसूची तोकिएको समयभित्र निर्वाचन अधिकृतको कार्यालयमा पेश गर्न राजनीतिक दलहरूलाई आग्रह गरिएको छ।
समानुपातिक निर्वाचन प्रणालीतर्फ उम्मेदवारको बन्दसूची पेस गर्ने समय पुस १३ र १४ गते तोकिएको छ। यी दुई दिन दलहरूले कार्यालय समयभित्र, अपराह्न ४ बजेसम्म निर्वाचन आयोग परिसरमा रहेका समानुपातिक निर्वाचन प्रणालीतर्फको अधिकृत कार्यालयमा सूची पेश गर्नुपर्ने छ।
निर्वाचन आयोगले बन्दसूची पेश भएपछि वा पेश गर्नु अघि सर्वसाधारणका लागि सार्वजनिक गर्न सक्ने व्यवस्था गरेको छ। यसले पारदर्शिता र सार्वजनिक निगरानी सुनिश्चित गर्न मद्दत पुग्ने विश्वास गरिएको छ।
आयोगका सहसचिव तथा प्रवक्ता नारायण प्रसाद भट्टराईले जारी गरेको विज्ञप्तिमा निर्वाचनसम्बन्धी कानुनी व्यवस्था र तोकिएको समय सीमाको पालना गर्न सबै सम्बन्धित पक्षलाई अनुरोध गरिएको छ। यस कदमले राजनीतिक दललाई सही समयमै उम्मेदवार पेस गर्न प्रेरित गर्ने र निर्वाचन प्रक्रियालाई व्यवस्थित बनाउन सहयोग पुर्याउने अपेक्षा गरिएको छ।
निर्वाचन आयोगले २०८२ साल फागुन २१ गते प्रतिनिधिसभा सदस्य निर्वाचनका लागि तय गरिएको कार्यक्रम नेपाल राजपत्रमा प्रकाशित भइसकेको छ। यसअनुसार राजनीतिक दलले आफ्नो समानुपातिक उम्मेदवारको बन्दसूची तयार राख्नु अनिवार्य छ।
प्रकाशित मिति: २०८२ पुष १३, शनिवार १४:२२
