काठमाडौँ, पुस  १४ । आगामी फागुन २१ मा हुने प्रतिनिधि सभा निर्वाचनका लागि समानुपातिकतर्फको उम्मेदवार बन्दसूची बुझाउने आज अन्तिम दिन भएकाले निर्वाचन आयोग परिसरमा राजनीतिक दलका नेताहरूको चहलपहल बढेको छ। आयोगले तोकेको समयसीमाभित्र सूची पेश गर्नुपर्ने दबाबका कारण दलहरूलाई आज दिनभर भ्याइनभ्याइ देखिएको हो।

निर्वाचन आयोगले समानुपातिकतर्फको बन्दसूची समावेशी सिद्धान्तअनुसार तयार गरी तोकिएको समयभित्र बुझाउन निर्देशन दिएको छ। सोहीअनुसार दलहरू आन्तरिक छलफल, बैठक र उम्मेदवार छनोटको अन्तिम गृहकार्यमा व्यस्त छन्।

अहिलेसम्म केही साना तथा मध्यम दलहरूले मात्र आयोगमा बन्दसूची बुझाइसकेका छन्। ठूला दलहरू भने अन्तिम सूची टुंग्याउने प्रक्रियामै रहेको बताइएको छ। दलभित्र उम्मेदवार छनोट, क्षेत्रीय सन्तुलन, लैंगिक तथा जातीय समावेशीताको विषयमा सहमति जुटाउन समय लागेको नेताहरूले बताएका छन्।

अपरान्ह ४ बजेपछि विभिन्न दलका प्रतिनिधि र नेताहरू बन्दसूचीसहित निर्वाचन आयोग पुग्न थालेका छन्। आयोग परिसरमा सुरक्षाकर्मी, सञ्चारकर्मी तथा दलका कार्यकर्ताको उपस्थिति बाक्लिँदै गएको छ।

निर्वाचन आयोगका अनुसार तोकिएको समयभित्र बन्दसूची नबुझाउने दलले समानुपातिकतर्फ निर्वाचनमा सहभागी हुन नपाउने व्यवस्था छ। त्यसैले अन्तिम घडीमा पनि दलहरू सूची बुझाउन आयोग धाइरहेका छन्।

राजनीतिक विश्लेषकहरूका अनुसार समानुपातिक सूचीमा को पर्छ भन्ने विषयले दलभित्रको शक्ति सन्तुलन मात्र होइन, निर्वाचनपछि बन्ने संसद्को स्वरूपमा समेत प्रभाव पार्नेछ। यही कारण दलहरू अन्तिम क्षणसम्म गम्भीर छलफल र समीकरणमा जुटिरहेका छन्।

आज साँझसम्म आयोगमा अधिकांश दलहरूको बन्दसूची दर्ता हुने अपेक्षा गरिएको छ।