काठमाडौं, पुस १६ । राजेन्द्र लिङ्देन नेतृत्वको राप्रपा र कमल थापा नेतृत्वको राप्रपा नेपालबीच एकता घोषणासभा आयोजना गरिएको छ। बुधबार काठमाडौंमा सम्पन्न कार्यक्रममा दुवै पक्षले आफ्नो एकता औपचारिक रुपमा सार्वजनिक गरेका छन्।
गत ९ पुसमा लिङ्देन र थापाले पार्टी एकता सम्बन्धी सहमतिपत्रमा हस्ताक्षर गरेका थिए। बुधबारको कार्यक्रममा त्यस सहमतिलाई सार्वजनिक गर्दै राजनीतिक पुनःएकताका लागि आवश्यक कदम उठाइएको हो।
पूर्व अध्यक्ष कमल थापाले ०७८ माघ २५ गते राप्रपाबाट अलग हुने घोषणा गरेका थिए। त्यसअघि ०७८ मंसिरमा भएको राप्रपाको महाधिवेशनमा उनले पराजय भोग्नु परेको र पूर्वराजा तथा निर्मल निवासले हस्तक्षेप गरेको आरोप लगाएका थिए।
थापाले त्यसपछि ०७८ फागुन ७ गते राप्रपा नेपाल गठनको घोषणा गरेका थिए। पार्टी विभाजनपछि दुवै पक्षले अलग(अलग राजनीतिक गतिविधि सञ्चालन गर्दै आएका थिए।
एकता घोषणासभाले आगामी समयमा राप्रपा र राप्रपा नेपालबीचको साझा रणनीति निर्माण र राजनीतिक सहकार्यलाई बलियो बनाउने अपेक्षा गरिएको छ। एकताको माध्यमबाट दुवै पक्षले आगामी निर्वाचन र राजनीतिक गतिविधिमा साझा एजेन्डा अघि बढाउने बताएका छन्।
कार्यक्रममा दुवै पक्षका नेता तथा कार्यकर्ताहरूले पार्टी एकताको महत्वमा जोड दिँदै राष्ट्रिय राजनीतिमा सशक्त भूमिका खेल्ने प्रतिबद्धता व्यक्त गरेका थिए।
राजनीतिक विश्लेषकहरूले पनि यो एकतालाई मध्यम आकारका पार्टीहरूबीचको स्थायित्व र रणनीतिक सुदृढीकरणको दृष्टिले सकारात्मक रूपमा लिएका छन्।
प्रकाशित मिति: २०८२ पुष १७, बुधवार १४:२२
