काठमाडौँ , पुस १६ । नेपाली कांग्रेसका महामन्त्री गगनकुमार थापाले पार्टीको विशेष महाधिवेशन पुस मसान्तभित्र आह्वान गर्ने तयारीमा अघि बढिएको जानकारी दिएका छन्। उनले पार्टीलाई राष्ट्रप्रति दायित्व पूरा गर्न सक्षम बनाउनु अहिलेको कांग्रेस कार्यकर्ताहरूको मुख्य जिम्मेवारी रहेको बताए।
मेलमिलाप दिवसको शुभकामना दिँदै महामन्त्री थापाले भने, “राष्ट्र प्रतिको दायित्व निर्वाह गर्न सक्ने कांग्रेस बनाउनु आजको प्रत्येक कांग्रेस कार्यकर्ताको युगिन जिम्मेवारी हो। यसै जिम्मेवारीलाई पूरा गर्न हामी पुस मसान्तभित्र विशेष महाधिवेशन आह्वान गर्ने बाटोमा अघि बढ्यौँ। सम्पूर्ण साथीहरूलाई दृढतापूर्वक यो मार्गमा हातेमालो गर्दै एकताबद्ध हुन आह्वान गर्दछु।”
उनले विशेष महाधिवेशनमार्फत पार्टी भित्रको एकता सुदृढ पार्ने, नयाँ नेतृत्व चयन गर्ने र लोकतान्त्रिक मूल्यलाई अझ बलियो बनाउने लक्ष्य रहेको बताए। यसका साथै पार्टीको संगठनात्मक सुधार, कार्यकर्ता सशक्तिकरण र आगामी चुनावका लागि रणनीति निर्माण गर्ने अवसर महाधिवेशनले दिने उनले बताए।
महामन्त्री थापाले पार्टीभित्र मतभेद र विवादलाई समाधान गर्दै सबैलाई एउटै दिशा र लक्ष्यमा अग्रसर गराउने महाधिवेशनको महत्व पनि उल्लेख गरेका छन्। उनका अनुसार, पार्टी एकताबद्ध भएसँगै देशको राजनीतिक स्थायित्वमा पनि योगदान पुग्नेछ।
विशेष महाधिवेशन आह्वानको तयारीसँगै नेपाली कांग्रेसले आफ्ना सबै तहका कार्यकर्ता, विभाग र सदस्यसँग समन्वय गर्दै व्यापक तयारीमा लाग्ने योजना बनाएको छ। पार्टी एकताबद्ध भएर अघि बढ्दा आगामी राजनीतिक चुनौतीहरू सामना गर्न सजिलो हुने विश्वास पनि व्यक्त गरिएको छ।
प्रकाशित मिति: २०८२ पुष १६, बुधबार १३:१५
