बुटवल, पुस २६ । फागुन २१ गते हुने प्रतिनिधि सभा निर्वाचनका लागि नेकपा एमालेले लुम्बिनी प्रदेशका १० निर्वाचन क्षेत्रमा एकल उम्मेदवार सिफारिस गरी पार्टी केन्द्रमा पठाएको छ। गुल्मी क्षेत्र नं. २ बाट गोकर्ण विष्ट र पश्चिम नवलपरासी क्षेत्र नं. २ बाट बैजनाथ चौधरीको नाम पार्टीले एकल उम्मेदवारका रूपमा सिफारिस गरेको हो।
एमाले लुम्बिनी प्रदेश कमिटीको बिहीबार बसेको सचिवालय बैठकले प्रदेशका १२ जिल्लाका २६ वटा निर्वाचन क्षेत्रमा उम्मेदवार नाम सिफारिस गरी पार्टी केन्द्रमा पठाएको प्रदेशका एक सचिवालय सदस्यले जानकारी दिएका छन्। यसअघि लुम्बिनी प्रदेशका ८ निर्वाचन क्षेत्रमा मात्रै एकल नाम सिफारिस गरिएको थियो। यसपालि विष्ट र चौधरीको नाम थपिँदा कुल १० क्षेत्र एकल उम्मेदवारको सूचीमा परेका छन्।
सिफारिस प्रक्रिया अनुसार गुल्मी २ मा विष्टको नाम एकल उम्मेदवारका रूपमा सिफारिस भए पनि जिल्लाबाट अन्य तीनजनाको नाम पनि प्रस्ताव गरिएको थियो। तर लोकप्रियता र पार्टी रणनीति हेरी प्रदेश कमिटीले विष्टको नाम केन्द्रमा पठाएको हो। नवलपरासी २ मा चौधरीको नाम सिफारिस गर्दा पनि अन्य केही उम्मेदवारको नाम रहेका भए पनि प्रदेश कमिटीले चौधरीको मात्र नाम पठाएको बताइएको छ।
गोकर्ण विष्ट २०५६ सालदेखि लगातार चुनाव लड्दै आएका छन् र २०६४ सालबाहेक सबै निर्वाचनमा विजयी भएका छन्। बैजनाथ चौधरी लुम्बिनी प्रदेशका पूर्वमन्त्री हुन् र २०७४ सालमा प्रदेशसभा सदस्य निर्वाचित भएका थिए। उनी शंकर पोखरेल नेतृत्वको सरकारले प्रवक्ता तथा भौतिक पूर्वाधार विकास मन्त्रीको जिम्मेवारी पनि सम्हालेका थिए।
यसैगरी, प्रदेश कमिटीले कतिपय क्षेत्रमा क्षेत्रीय र जिल्लाबाट सिफारिस गरिएका उम्मेदवारमा थप नामहरू थपेर केन्द्रमा पठाएको छ। दाङ, बाँके, अर्घाखाँची र पाल्पा क्षेत्रका केही उम्मेदवारको नाम थप गरी पार्टी केन्द्रमा पठाइएको छ।
यो निर्णयले एमालेले लुम्बिनी प्रदेशमा चुनावी रणनीति स्पष्ट पार्ने र बलियो उम्मेदवारमार्फत आफ्नो स्थिति सुदृढ गर्ने प्रयास गरेको देखिन्छ।
प्रकाशित मिति: २०८२ पुष २६, शनिबार १४:४४
