काठमाडौं, पुस २८। नेपाली कांग्रेसको विशेष महाधिवेशनको बन्दसत्रले सोमबार भृकुटीमण्डपमा ‘नेपाली कांग्रेस विशेष केन्द्रीय महाधिवेशन कार्यविधि २०८२’ पारित गरेको छ। कार्यविधि पारितसँगै अब विशेष महाधिवेशनका बाँकी कार्यक्रम र गतिविधि निर्धारित ढाँचाअनुसार अघि बढ्ने भएका छन्।
कांग्रेस प्रचारप्रसार समितिका संयोजक सुवास पोखरेलका अनुसार कार्यविधि पारित भएपछि महाधिवेशनको सञ्चालन अझ व्यवस्थित र नियमित हुने अपेक्षा गरिएको छ। उनले बताए अनुसार, यस कार्यविधिको आधारमा प्रतिवेदन पेश गर्ने, प्रस्ताव पेस गर्ने र निर्णय गर्ने प्रक्रिया सबै स्पष्ट हुनेछन्।
कार्यविधिको प्रस्तावनामा उल्लेख छ कि, ‘नेपाली कांग्रेसको विधान, २०१७ ९संशोधनसहित० को धारा १७ को उपधारा ९२० बमोजिम बोलाइएको विशेष केन्द्रीय महाधिवेशनले आफ्नो कामकारबाहीलाई व्यवस्थित गर्न कार्यविधि बनाउनु आवश्यक रहेको थियो। विधानको धारा ५ बमोजिम सर्वोच्च अधिकार सम्पन्न निकायलाई निहित अधिकार प्रयोग गरी कार्यविधि लागू गरिएको हो।’
पारित कार्यविधिमा विशेष महाधिवेशन सञ्चालनसम्बन्धी स्पष्ट व्यवस्थाका साथै प्रस्ताव, निर्णय र प्रतिवेदन पेश गर्ने नियमावली समावेश गरिएको छ। यसमा गणनात्मक संख्या, निर्वाचन समितिको गठन, मतदान प्रक्रिया र अन्य संगठनात्मक पक्षसमेत उल्लेख गरिएको छ।
विशेष महाधिवेशनका प्रतिनिधिहरूले अब यस कार्यविधि अनुसार छलफल, प्रस्ताव र मतदानमा सहभागी हुनेछन्। कार्यविधि पारित भएपछि महाधिवेशनको बाँकी कार्यक्रम सञ्चालनमा पारदर्शिता र एकरूपता सुनिश्चित हुने नेताहरूले बताएका छन्।
विशेष महाधिवेशनले पार्टीभित्रको संगठनात्मक ढाँचा सुदृढ गर्ने र आगामी राजनीतिक रणनीतिका लागि आधार तयार गर्ने उद्देश्य राखेको छ। आगामी दिनमा यस कार्यविधि अनुसार पार्टी विधान कार्यान्वयनमा थप गति आउने विश्वास गरिएको छ।
प्रकाशित मिति: २०८२ पुष २९, सोमवार १२:२१
