काठमाडौं, पुस ३० । नेपाली कांग्रेसको विशेष महाधिवेशनमा सभापति शेरबहादुर देउवाको भूमिकालाई लिएर विवाद चर्किँदै गएको छ। विशेष महाधिवेशन पक्षले आगामी प्रतिनिधिसभा निर्वाचनअघि देउवाले सक्रिय राजनीतिबाट विश्राम लिनुपर्ने अडान दोहोर्याउँदै आएको छ भने संस्थापन पक्ष यस विषयमा सहमत देखिएको छैन।
पुस २७ गतेदेखि काठमाडौंको भृकुटीमण्डपमा जारी विशेष महाधिवेशन पार्टीभित्रको शक्ति संघर्ष र नेतृत्व व्यवस्थापनका विषयमा केन्द्रित बनेको छ। सहमतिका लागि पटक–पटक छलफल भए पनि मुख्य दुई विषयमा कुरा नमिल्दा महाधिवेशन लम्बिएको हो।
विशेष महाधिवेशन पक्षका नेताहरूका अनुसार आगामी फागुन २१ गते हुने प्रतिनिधिसभा निर्वाचनमा सभापति देउवाले उम्मेदवारी नदिई पार्टीको संरक्षक भूमिकामा सीमित हुनुपर्छ। उनीहरू देउवाको विश्रामले पार्टीभित्र नयाँ नेतृत्वलाई अघि बढ्ने अवसर मिल्ने र आन्तरिक विवाद कम हुने दाबी गर्छन्।
तर संस्थापन पक्षले भने देउवाको अनुभव र नेतृत्व आगामी निर्वाचनमा पार्टीका लागि आवश्यक रहेको बताउँदै विश्रामको प्रस्ताव अस्वीकार गर्दै आएको छ। संस्थापन पक्षका नेताहरूले देउवाबिना पार्टी कमजोर हुने र निर्वाचनमा असर पर्ने तर्क अघि सारेका छन्।
यसैबीच, निर्वाचनमा पार्टीका तर्फबाट उम्मेदवार चयन गर्दा कार्यवाहक सभापति पूर्णबहादुर खड्काले हस्ताक्षर गर्नुपर्ने मागमा पनि सहमति जुट्न सकेको छैन। विशेष महाधिवेशन पक्षले अधिकार हस्तान्तरण बिना नयाँ कार्यसमिति गठनको अर्थ नहुने बताएको छ।
देउवाबाहेकको ‘हाइकमाण्ड’ बनाएर पार्टी सञ्चालन गर्ने प्रस्तावमा समेत कुरा नमिल्दा विशेष महाधिवेशन थप जटिल बनेको छ। सहमति नजुटेपछि आज नेतृत्व चयनका लागि उम्मेदवारी मनोनयन प्रक्रिया अगाडि बढाइएको छ।
पार्टीभित्रको यो शक्ति संघर्षले कांग्रेसको एकता र आगामी निर्वाचन रणनीतिमा कस्तो असर पार्छ भन्ने चासो बढ्दै गएको छ।
प्रकाशित मिति: २०८२ माघ १, बुधवार ०७:३७
