हेटौँडा, माघ ३ । बागमती प्रदेशका केही पूर्व मुख्यमन्त्री र वर्तमान सांसदहरू आगामी फागुन २१ गते हुने प्रतिनिधि सभा निर्वाचनमा उम्मेदवारी दिने तयारीमा छन्। प्रदेश सभामा अझै दुई वर्ष कार्यकाल बाँकी रहँदा उनीहरूले संघीय संसदतर्फ कदम चाल्ने योजना बनाएका हुन्।
कांग्रेसबाट पूर्व मुख्यमन्त्री बहादुर सिंह लामा नुवाकोट–२ बाट प्रतिनिधि सभाको उम्मेदवार बन्ने दौडमा छन्। लामा २०८० साउन ९ देखि २०८१ साउन २० सम्म बागमती प्रदेशको मुख्यमन्त्री रहेका थिए भने २०७९ चैतदेखि २०८० फागुनसम्म अर्थमन्त्रीको जिम्मेवारी सम्हालेका थिए।
यस्तै, दोलखाबाट प्रदेश सांसद कुन्दन काफ्ले र ललितपुर–२ बाट सांसद रामकृष्ण चित्रकार पनि प्रतिनिधि सभा निर्वाचनमा होमिने तयारीमा छन्। काफ्ले प्रदेश सभाबाट राजीनामा दिने तयारीमा रहेका छन् भने चित्रकार पूर्व उद्योग, वाणिज्य, भूमि तथा प्रशासन मन्त्रीसमेत हुन्।
एमालेबाट प्रकाश श्रेष्ठ काठमाडौँ–७ र अमन कुमार मास्के काठमाडौँ–६ बाट प्रतिनिधि सभाको चुनाव लड्ने तयारीमा छन्। श्रेष्ठ दुई कार्यकाल प्रदेश सभा सदस्य रहिसकेका छन् भने मास्के हालै सम्पन्न एमाले महाधिवेशनमा केन्द्रीय सदस्यमा निर्वाचित भएका छन्।
तत्कालीन नेकपा माओवादी केन्द्रका प्रदेश सांसद युवराज दुलाल ‘शरद’ सिन्धुपाल्चोक–२ बाट उम्मेदवार बन्ने तयारीमा छन्। राष्ट्रिय प्रजातन्त्र पार्टी (राप्रपा) का पूर्वसभामुख भुवन कुमार पाठकले पनि प्रदेश सांसदबाट राजीनामा दिई काठमाडौँ–४ बाट उम्मेदवारी दिने तयारी गरिरहेका छन्।
त्यसैगरी पूर्वमन्त्री कृष्णप्रसाद सिलवाल, कुमारी तामाङ, प्रेमबहादुर पुलामी, कुमारी मोक्तान लगायतका नेताहरू पनि प्रतिनिधि सभामा उम्मेदवार बन्ने दौडमा रहेका छन्। टिकट पाएको खण्डमा उनीहरूले माघ ५ गते हेटौँंडा आएर प्रदेश सभाबाट राजीनामा दिने तयारी गरेका छन्।
बागमतीका पूर्व र वर्तमान सांसदहरूको यस तयारीले आगामी निर्वाचनमा प्रतिस्पर्धा र राजनीतिक हलचल थप गर्ने अपेक्षा गरिएको छ।
प्रकाशित मिति: २०८२ माघ ४, शनिवार १६:०६
