एजेन्सी, माघ १६ । उत्तर प्रदेशलाई एक ट्रिलियन डलरको अर्थतन्त्र बनाउने लक्ष्यअनुसार सूचना प्रविधि, आर्टिफिसियल इन्टेलिजेन्स (एआई), ड्रोन प्रविधि तथा इलेक्ट्रोनिक्स क्षेत्रलाई तीव्र गतिमा विस्तार गर्ने सरकारी प्रयासले नयाँ गति लिएको छ। यसैक्रममा लखनऊमा प्रस्तावित एआई सिटीको प्रि–फिजिबिलिटी अध्ययन (परियोजना सुरु गर्नुअघि गरिने प्रारम्भिक मूल्यांकन) सफलतापूर्वक सम्पन्न भएको छ।
अब एआई सिटीका लागि उपयुक्त जमिन पहिचान गर्ने र लगानी प्रक्रिया अघि बढाउने तयारी भइरहेको छ। यो जानकारी आईटी तथा इलेक्ट्रोनिक्स मन्त्री सुनील कुमार शर्माको अध्यक्षतामा बापू भवनमा सम्पन्न समीक्षा बैठकमा सार्वजनिक गरिएको हो।
समीक्षा बैठकमा विभागअन्तर्गतका नीति, योजना तथा हालसम्म भएका उपलब्धिहरूको विस्तृत समीक्षा गरिएको थियो। अधिकारीहरूले एआई सिटीमार्फत प्रविधिमा आधारित विकासलाई प्रोत्साहन दिइने बताएका छन्। यस परियोजनाले लगानी आकर्षित गर्नुका साथै ठूलो मात्रामा रोजगारी सिर्जना गर्ने अपेक्षा गरिएको छ।
बैठकमा आर्टिफिसियल इन्टेलिजेन्ससँग सम्बन्धित सीप विकास, अनुसन्धान, नवप्रवर्तन र स्टार्टअप प्रवर्द्धनका लागि तयार पारिँदै गरिएको उत्तर प्रदेश एआई मिसन को मस्यौदामाथि पनि छलफल गरिएको थियो।
गौतम बुद्ध नगरलाई ग्लोबल आइटी, आइटीईएस तथा ग्लोबल क्यापाबिलिटी सेन्टरको प्रमुख केन्द्रका रूपमा विकास गर्ने पहलहरूको समेत समीक्षा गरिएको छ। यस क्रममा जारी गरिएको अपरेशनल गाइडलाइन, लगानीकर्ताका लागि तयार पारिएको सुविधा प्रणाली तथा कम्पनीहरूसँग भइरहेका संवादबारे जानकारी प्रस्तुत गरिएको थियो।
त्यसैगरी बैठकमा ड्रोन उत्पादन, ड्रोन परीक्षण तथा अनुसन्धानसँग सम्बन्धित प्रस्तावहरूमाथि विचार(विमर्श गरिएको थियो। कृषि, सर्वेक्षण, विपद् व्यवस्थापनजस्ता क्षेत्रमा ड्रोनको सम्भावित प्रयोगबारे समेत छलफल भएको छ।
बैठकमा राज्य मन्त्री अजीत पाल, आईटी तथा इलेक्ट्रोनिक्स विभागका प्रमुख सचिव अनुराग यादवसहित सम्बन्धित अधिकारीहरूको उपस्थिति रहेको थियो। डेलाइट टोलीले बैठकमा विस्तृत प्रस्तुतीकरण पनि दिएको थियो।
प्रकाशित मिति: २०८२ माघ १६, शुक्रबार ०७:४१
