एजेन्सी, माघ २२। पश्चिमी नाइजीरिया स्थित क्वारा राज्य का दुई गाउँ वोरो र नुकु मा मंगलबार साँझ आतंकवादी हमलामा कम्तीमा २०० भन्दा बढी नागरिकको मृत्यु भएको छ। यो हालका महिनाहरूमा भएको सबैभन्दा घातक आक्रमण मानिएको छ।

स्थानीय सांसद मोहम्मद उमर बायो का अनुसार, हमला ‘लकुरावा’ नामक सशस्त्र समूहले गरेको हो, जसको सम्बन्ध खतरनाक आतंकी संगठन इस्लामिक स्टेट  सँग जोडिएको छ। रेड क्रसका अनुसार प्रभावित क्षेत्र दुर्गम पहाडी भेगमा रहेको छ र राज्यको राजधानीबाट करिब ८ घण्टा टाढा छ।

घटनास्थल बेनिन सीमा नजिक र खराब संचार अवस्थाका कारण राहत कार्यमा कठिनाइ आएको छ। क्वारा राज्यका गवर्नर अब्दुल रहमान अब्दुल रजाक ले यसलाई ूहताशामा गरिएको कायरतापूर्ण कार्रवाईू बताउँदै नागरिकहरूका लागि सुरक्षा चुनौती भएको बताएका छन्।

गवर्नरका अनुसार, यो हमला राज्यमा जारी सैन्य अभियानको प्रतिशोध स्वरूप गरिएको हुन सक्ने अनुमान छ। नाइजीरिया अहिले जटिल सुरक्षा संकटमा फसिरहेको छ। देशको उत्तर–पूर्वी क्षेत्रमा विद्रोह जारी छ भने उत्तर–पश्चिम र उत्तर–मध्य क्षेत्रमा फिरौतीका लागि अपहरण र सशस्त्र डकैती का घटनाहरू तीव्र रूपमा बढिरहेका छन्।

सुरक्षा चुनौती र दुर्गम क्षेत्रको अवस्थाले प्रभावित समुदायलाई तत्काल राहत उपलब्ध गराउन कठिनाइ भएको समाचारहरूमा उल्लेख छ। स्थानीय अधिकारीहरूले आतंकवादी समूह विरुद्ध सतर्कता अपनाउन र प्रभावित क्षेत्रको सुरक्षामा ध्यान दिन आग्रह गरेका छन्।

यो हमला नाइजीरियामा नागरिक सुरक्षा संकट र चरम हिंसाको जोखिमलाई पुनः उजागर गर्ने घटनाको रूपमा देखिएको छ।