वासिङ्टन, फागुन ४ । अमेरिकाका पूर्व राष्ट्रपति बराक ओबामा ले वर्तमान डोनाल्ड ट्रम्प प्रशासनको राजनीतिक संस्कृतिमाथि कडा टिप्पणी गरेका छन्। हालैको एक अन्तर्वार्तामा उनले अमेरिकी राजनीति “जोकरहरूको शो” मा परिणत भएको भन्दै सार्वजनिक जीवनमा शालीनता र मर्यादाको स्तर खस्किँदै गएको बताएका हुन्।
ब्रायन टायलर कोहेन को No Lie with Brian Tyler Cohen मा बोल्दै ओबामाले ह्वाइट हाउससँग जोडिएको एक विवादित भिडियोप्रति संकेत गरे, जहाँ उनलाई र पूर्व प्रथम महिला मिशेल ओबामा लाई आपत्तिजनक ढंगले चित्रण गरिएको थियो। त्यस विषयमा ट्रम्पले माफी न मागी कर्मचारीको गल्ती भनेको प्रसङ्ग उल्लेख गर्दै ओबामाले यस्तो व्यवहार धेरै अमेरिकी नागरिकलाई असहज बनाउने बताए।
ओबामाका अनुसार अहिले राजनीतिक बहसमा सभ्यता हराउँदै गएको छ। “पहिले पदप्रति सम्मान, शिष्टाचार र मर्यादा आवश्यक ठानिन्थ्यो, तर अहिले त्यो हराइसकेको देखिन्छ,” उनले भने।
ध्यान भटकाउने रणनीति
अन्तर्वार्ताका क्रममा नागरिकलाई ‘घरेलु आतंकवादी’ जस्ता शब्द प्रयोग गर्ने प्रवृत्तिबारे प्रश्न उठ्दा ओबामाले यसलाई वास्तविक मुद्दाबाट ध्यान हटाउने प्रयासको रूपमा व्याख्या गरे। अधिकांश अमेरिकी अझै पनि शालीनता र दयालु व्यवहारमा विश्वास गर्ने उनको भनाइ थियो।
डेमोक्रेट्सलाई चेतावनी
ओबामाले प्रतिपक्षलाई जवाफ दिँदा उस्तै शैली अपनाउनु गलत हुने बताए। “यदि हामी पनि सत्यको पर्वाह नगरी उस्तै तरिकाले लड्यौं भने, हामीले जोगाउन खोजेको मूल्य नै गुम्नेछ,” उनले भने।
आफ्नो कार्यकाल सम्झिँदै उनले शक्तिको दुरुपयोग गर्न सकिने अवस्था भए पनि लोकतान्त्रिक प्रणालीको सम्मानका कारण त्यसो नगरेको उल्लेख गरे। लोकतन्त्रको रक्षा सधैं चुनौतीपूर्ण हुने भएकाले समर्थकहरूलाई निराश नहुन उनले आग्रह गरेका छन्।
प्रकाशित मिति: २०८२ फाल्गुन ४, सोमबार ०८:२५
