एजेन्सी, चैत १७ । इरानबाट भारत आउँदै गरेको एक विमान अमेरिकी हवाई आक्रमणको चपेटामा परेको दाबी गरिएको छ। उक्त विमान मानवीय सहायता मिशनअन्तर्गत नयाँ दिल्लीतर्फ उडान भर्ने तयारीमा रहेको बताइएको छ।
समाचार एजेन्सी एएनआईलाई उद्धृत गर्दै इरानी स्रोतहरूले जनाएअनुसार मशहद अन्तर्राष्ट्रिय विमानस्थल मा पार्किङ अवस्थामा रहेको महान एयर को विमानमाथि अमेरिकी आक्रमण भएको हो। आक्रमणका कारण विमानमा क्षति पुगेको जनाइएको छ।
उक्त विमान केही दिनभित्र नयाँ दिल्ली पुगेर औषधिसहित विभिन्न मानवीय राहत सामग्री ढुवानी गर्ने योजना रहेको बताइएको थियो।
यस घटनाले इरान र अमेरिकाबीच जारी भू–राजनीतिक तनावका बीच नागरिक उड्डयन तथा मानवीय सहायता सम्बन्धी उडानहरूको सुरक्षाबारे नयाँ चिन्ता थपेको छ।
इरानले भारतसँग समन्वय गरेर मानवीय सहायता पठाउने तयारी गरिरहेको थियो। यसअघि पनि यही महिनाको सुरुवातमा भारतले इरानलाई सहायता सामग्री पठाएको थियो।
घटनाबारे अमेरिकाको तर्फबाट आधिकारिक पुष्टि भने अहिलेसम्म भएको छैन। तर यसले पहिले नै तनावपूर्ण रहेको वासिङ्टन–तेहरान सम्बन्धलाई अझ जटिल बनाउन सक्ने अनुमान गरिएको छ।
उल्लेखनीय छ कि महान एयर इरानको प्रमुख निजी विमान कम्पनीमध्ये एक हो र विगतदेखि नै अमेरिकी प्रतिबन्धको दायरामा पर्दै आएको छ। अमेरिकाले यस कम्पनीको सम्बन्ध इरानको ‘इस्लामिक रिभोलुसनरी गार्ड कर्प्स (igrc) सँग रहेको आरोप लगाउँदै आएको छ।
प्रकाशित मिति: २०८२ चैत्र १७, मंगलवार ०८:१५
