सप्तरी, जेठ ९ । राजविराज नगरपालिकाका सवइन्जिनियर मनोज कुमार यादवलाई कुटपिट गरेको भनी आरोप लागेका गुलाब यादवको बचाउ गर्दै यातायात मजदुरका अगुवाहरुले प्रमुख जिल्ला अधिकारीलाई ज्ञापन पत्र बुझाएका छन् ।

नेपाल यातायात स्वतन्त्र मजदुर संगठनका केन्द्रिय सदस्य धिरेन्द्र बर्मा धिरुको अगुवाईमा शुक्रबार जिल्ला प्रशसन कार्यालय पुगेको टोलीले प्रमुख जिल्ला अधिकारीलाई ज्ञापन पत्र बुझाएको हो ।
नगरपालिकाका इन्जिनियर यादवले पुरानो रिसिइवी साध्न गुलाबमाथी कुटपिटको झुठो आरोप लगाएको ज्ञापन पत्रमार्फत दाबी गरिएको छ ।

ज्ञापन पत्रमा घटना बारे प्रत्यक्षदर्शी, स्थानीयवासी तथा वडाअध्यक्ष जयनारायण मण्डलसँग सत्यतथ्य बुझ्न आग्रहसहित निर्दोषलाई फसाउने प्रयास बिरुद्ध मजदुरहरु संगठित रुपमा आन्दोलनमा जाने चेतावनी समेत दिइएको छ ।

यता राजविराज ८ निवासी गुलावमाथी कारवाहीको माग गर्दै विगत तीन दिनदेखी धर्नामा बसेका नगरपालिकाका कर्मचारीहरुले शुक्रबार दिउँसोदेखी धर्ना कार्यक्रम स्थगित गरेका छन् ।
प्रहरी प्रशासनले गुलाबबिरुद्ध मुद्दा दर्ता भई पक्राउ पूर्जी समेत जारि भइसकेकाले आन्दोलनका कार्यक्रमहरु रोक्न आग्रह गरेपछी तत्कालका लागि धर्ना कार्यक्रम स्थगित गरेको राजविराज नगरपालिका कर्मचारी संघर्ष समितिले जनाएको छ ।