काठमाडौं, भदौ २ । प्रधानमन्त्री तथा रक्षामन्त्री वालेन्द्र शाह र भारतीय स्थल सेनाध्यक्ष धीरज सेठबीच मंगलबार शिष्टाचार भेटवार्ता भएको छ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा नेपाल–भारत द्विपक्षीय सम्बन्ध तथा आपसी चासोका विषयमा छलफल भएको जनाइएको छ। भेटमा नेपालका लागि भारतीय राजदूत नवीन श्रीवास्तवसमेत सहभागी थिए।
प्रधान सेनापति अशोकराज सिग्देलको औपचारिक निमन्त्रणामा भारतीय सेनाध्यक्ष सेठ चारदिने नेपाल भ्रमणका क्रममा आइतबार काठमाडौं आएका हुन्।
भ्रमणका क्रममा सोमबार राष्ट्रपति रामचन्द्र पौडेलले सेनाध्यक्ष सेठलाई नेपाली सेनाको मानार्थ महारथीको दर्ज्यानी चिह्न प्रदान गरेका थिए।
नेपाल र भारतबीच सन् १९५० देखि एकअर्का देशका सेना प्रमुखलाई मानार्थ महारथीको दर्ज्यानी चिह्न प्रदान गर्ने परम्परा रहँदै आएको छ।
सेठले सोमबार नै प्रधान सेनापति अशोकराज सिग्देलसँग द्विपक्षीय भेटवार्ता गरेका थिए। उनको नेपाल भ्रमणलाई दुई देशका सेनाबीचको परम्परागत सम्बन्ध र सहकार्यलाई थप सुदृढ गर्ने अवसरका रूपमा हेरिएको छ।
प्रकाशित मिति: २०८३ भाद्र २, मंगलवार १६:४०
