काठमाडौं, भदौ ३१ । भारतीय आयल कर्पोरेसन (आईओसी) बाट पेट्रोलियम पदार्थको खरिद मूल्य बढेर आए पनि नेपाल आयल निगमले नेपालमा बिक्री हुने इन्धनको खुद्रा मूल्य यथावत राख्ने निर्णय गरेको छ।
निगमका अनुसार भदौ ३० गते प्राप्त नयाँ खरिद मूल्यमा पेट्रोलको मूल्य प्रतिलिटर १२ रुपैयाँ ४० पैसा र डिजेलको मूल्य प्रतिलिटर ४ रुपैयाँ ६८ पैसा बढेर आएको छ।
अन्तर्राष्ट्रिय बजारमा मध्यपूर्वमा जारी द्वन्द्वका कारण इन्धनको मूल्यमा उतारचढाव भइरहेको छ। यद्यपि, भोटेकोशी क्षेत्रमा आएको असाधारण बाढीबाट सिर्जित कठिन परिस्थितिलाई ध्यानमा राख्दै निगम सञ्चालक समितिले हाल कायम रहेको खुद्रा मूल्यलाई निरन्तरता दिने निर्णय गरेको हो।
निगमको यो निर्णय भदौ ३१ गते अर्थात् १६ सेप्टेम्बर २०२६ देखि लागू भएको छ।
खुद्रा मूल्य समायोजन नगर्दा नेपाल आयल निगमलाई पाक्षिक रूपमा करिब १ अर्ब ९१ करोड ६९ लाख रुपैयाँ घाटा हुने अनुमान गरिएको छ।
निगमको निर्णयअनुसार काठमाडौं, पोखरा र दिपायललगायतका क्षेत्रमा पेट्रोल र डिजेल प्रतिलिटर २०० रुपैयाँमा बिक्री हुनेछ। त्यस्तै, खाना पकाउने एलपी ग्यासको मूल्य प्रतिसिलिन्डर २ हजार ६० रुपैयाँ कायम रहनेछ।
प्रकाशित मिति: २०८३ भाद्र ३१, बुधबार ०७:३३
