काठमाडौं, असोज १ । अर्थमन्त्री डा. स्वर्णिम वाग्ले तीनदिने भारत भ्रमणका लागि बिहीबार नयाँदिल्ली प्रस्थान गरेका छन् । भारत सरकारको निमन्त्रणामा उनी बिहान ७ः३५ बजेको उडानमार्फत काठमाडौं हुँदै नयाँदिल्ली गएका हुन् ।
भ्रमणका क्रममा नेपाल–भारतबीचको आर्थिक सहकार्य, राजनीतिक तथा कूटनीतिक सम्बन्धका विभिन्न पक्षमा छलफल हुने बताइएको छ । विपद्पछिको पुनर्निर्माण तथा दुई देशबीच आर्थिक साझेदारी विस्तारका विषय पनि भ्रमणको प्राथमिकतामा रहेको जनाइएको छ ।
अर्थमन्त्री वाग्लेसँगै अर्थ मन्त्रालयका सहसचिव अमृत लम्साल, परराष्ट्र मन्त्रालयका सहसचिव गेहेन्द्र राजभण्डारी र नयाँदिल्लीस्थित नेपाली दूतावासका उपनियोग प्रमुख डा. सुरेन्द्र थापासहितको टोली भारत गएको छ ।
भ्रमण तालिकाअनुसार बिहीबार साँझ ५ बजे अर्थमन्त्री वाग्लेले भारतीय समकक्षी निर्मला सीतारमणसँग भेटवार्ता गर्ने कार्यक्रम छ ।
शुक्रबार बिहान ९ बजे पूर्वविदेशसचिव श्याम शरणले आयोजना गर्ने उच्चस्तरीय कूटनीतिक संवाद कार्यक्रममा उनी प्रमुख अतिथिका रूपमा सहभागी हुनेछन् । त्यसै दिन साँझ ५ बजे भारतीय विदेशमन्त्री डा. एस. जयशंकरसँग भेटवार्ता गर्ने कार्यक्रम तय भएको छ ।
शुक्रबार साँझ ७ः३० बजे भारत व्यापार प्रवर्द्धन संगठनका अध्यक्ष जावेद अश्राफले आयोजना गर्ने भेटघाट कार्यक्रममा अर्थमन्त्री वाग्ले सहभागी हुनेछन् ।
शनिबार बिहान ९ः३० बजे भारतीय उद्योग परिसंघले आयोजना गर्ने प्रतिष्ठित औद्योगिक घरानाका प्रतिनिधिसँगको सम्मेलनमा वाग्ले प्रमुख वक्ताका रूपमा सहभागी हुनेछन् । त्यसपछि बिहान ११ः३० बजे दिल्ली स्कुल अफ इकोनोमिक्सले आयोजना गर्ने विकास अर्थनीतिसम्बन्धी प्राज्ञिक छलफलमा प्रमुख अतिथिका रूपमा सहभागी हुने कार्यक्रम छ ।
तीनदिने भारत भ्रमण सम्पन्न गरी अर्थमन्त्री वाग्ले शनिबार दिउँसो ४ बजे स्वदेश फर्किने कार्यक्रम रहेको छ ।
प्रकाशित मिति: २०८३ आश्विन १, बिहीबार ०८:२४
