काठमाडौं, असोज ८ । नेपाली कांग्रेसले १५औँ महाधिवेशनको लोगो र मूल नारा सार्वजनिक गरेको छ। कांग्रेसले बिहीबार सामाजिक सञ्जालमार्फत महाधिवेशनको आधिकारिक लोगो तथा नारा सार्वजनिक गरेको हो।
कांग्रेसले महाधिवेशनका लागि ‘परम्पराको सम्मान, परिवर्तनको संकल्प, समुन्नत नेपालका लागि सबल कांग्रेस अबको विकल्प’ भन्ने मूल नारा तय गरेको छ।
सार्वजनिक गरिएको लोगोमा कांग्रेसका संस्थापक नेता तथा नेपालको पहिलो जननिर्वाचित प्रधानमन्त्री बीपी कोइरालादेखि निवर्तमान सभापति शेरबहादुर देउवासम्मका नेताहरूको तस्बिर समेटिएको छ। लोगोमा बीपी कोइराला, सुवर्ण शमशेर, गणेशमान सिंह, कृष्णप्रसाद भट्टराई, गिरिजाप्रसाद कोइराला, सुशील कोइराला र शेरबहादुर देउवाको तस्बिर राखिएको छ।
कांग्रेसले १५औँ केन्द्रीय महाधिवेशन असोज १६ देखि १९ गतेसम्म काठमाडौंमा गर्ने कार्यतालिका तय गरेको छ। महाधिवेशनअन्तर्गत असोज १० गते प्रदेशसभा र प्रतिनिधिसभा निर्वाचन क्षेत्रको अधिवेशन गर्ने कार्यक्रम रहेको छ।
महाधिवेशनको तयारीअन्तर्गत कांग्रेसले यसअघि नै विभिन्न तहका अधिवेशनको प्रक्रिया अघि बढाइसकेको छ। क्षेत्रीय अधिवेशनपछि केन्द्रीय महाधिवेशनमा सहभागी हुने प्रतिनिधि छनोटलगायतका प्रक्रिया अघि बढाइनेछ।
कांग्रेसले महाधिवेशनलाई संगठनात्मक गतिविधि तथा नेतृत्व चयनको महत्वपूर्ण प्रक्रियाका रूपमा अघि बढाइरहेको छ। महाधिवेशनको लोगो र नारा सार्वजनिक भएसँगै कांग्रेसको महाधिवेशनसम्बन्धी औपचारिक प्रचार अभियानसमेत अघि बढेको छ।
प्रकाशित मिति: २०८३ आश्विन ८, बिहीबार १७:२८
