म्यानमार, चैत १७ । म्यानमारमा फेरि भूकम्पको धक्का महसुस गरिएको छ । यसको तीव्रता रिक्टर स्केलमा ५.१ मापन गरिएको छ । यसरी, पछिल्ला २ दिनमा ५ भन्दा बढी तीव्रताका तीनवटा भूकम्प गए ।
शुक्रबार ७.७ म्याग्निच्युडको भूकम्पपछि म्यानमारमा ठूलो क्षति भएको छ । मृत्यु हुनेको संख्या १० हजार नाघ्न सक्छ । यो आशंका संयुक्त राज्य भूगर्भ सर्वेक्षणले व्यक्त गरेको छ । भूकम्पको धक्का थाइल्याण्ड, बंगलादेश, चीन र भारतसम्म महसुस गरिएको थियो ।
समाचार एजेन्सी एएफपीका अनुसार शनिबारसम्म मृत्यु हुनेको संख्या १,६४४ पुगेको छ भने ३,४०८ भन्दा बढी घाइते भएका छन् र १३९ जना बेपत्ता छन् । अर्कोतर्फ, थाइल्याण्डको राजधानी बैंककमा ३० तले भवन भत्किएको छ । यसमा १० जनाको मृत्यु भयो ।
शुक्रबार बिहान ११ बजेर ५० मिनेटमा म्यानमारमा ७.७ म्याग्निच्युडको भूकम्प गएको थियो । यो दुई सय वर्षमा म्यानमार र थाइल्याण्डमा गएको सबैभन्दा ठूलो भूकम्प थियो। ठूलो विनाशका कारण म्यानमारका छ राज्य र सम्पूर्ण थाइल्याण्डमा आपतकाल लगाइएको थियो ।
प्रकाशित मिति: २०८१ चैत्र १७, आइतवार ०७:५१
