जनकपुरधाम, वैशाख ३० । जनकपुरधाममा जारी तेस्रो जनकपुरधाम मेयर कप टी २० प्रतियोगिता अन्तर्गत आज भएको दुई खेलमा पर्सा र भारतको उत्तर प्रदेशका लखनउ टिम विजयी भएका छन् ।
जनकपुरधाम स्थित निर्माणाधीन रामजानकी बहुउद्देश्यीय अन्तर्राष्ट्रिय रङ्गशालामा भएको पहिलो खेलमा लखनउ टिमले सिरहा टिमलाई ९ विकेटले पराजित गरेको छ भने दोस्रो खेलमा पर्साले दिल्ली टिमलाई ८ विकेटले पराजित गरेको छ ।
पहिलो खेलमा टस जितेर बलिङ गरेको भारतको लखनउ टिमले १२३ रनको लक्ष्य १४.२ ओभरमा एक विकेट गुमाउँदै पुरा गरेको हो । लखनउको तर्फबाट प्रिथुल मेहताले अविजित ५१ बलमा ६२ र सोमेन मोहेन्टीले ३० बलमा ५० रन बनाए । यस्तै, सुमित पाठकले ५ बलमा ५ रन बनाएर दिनेश अधिकारीको बलमा आउट भएका थिए ।
टस हारेर ब्याटिङ गरेको सिराहाले निर्धारित २० ओभरमा सबै विकेट गुमाउँदै १२२ रन बनाएको थियो ।
दोस्रो खेलमा दिल्लीले टस जितेर व्याटिंग गरेकोमा ६० रन मात्र जोडेकोमा पर्साले ६.४ ओभरमा २ विकेट गुमाउँदै लक्ष्य पार गर्दै विजयी भएका थिए ।
जनकपुरधाम उपमहानगरपालिकाको आयोजना तथा नेपाल क्रिकेट सङ्घको सहयोगमा भइरहेको मेयर कपमा मधेस प्रदेशको ८ वटा जिल्ला टिम ८ र भारतको विहारका २, उत्तर प्रदेशका १ र दिल्लीका १ गरेर ४ वटा टिम सहभागी रहेका छन् ।
लिग चरणको अन्तिम खेल बुधबार लखनउ र रौतहटबिच तथा बारा र दिल्लीबिच हुने तालिका रहेको छ ।
जनकपुरधाम मेयर कपमा विजेता टिमलाई २ लाख नगदसहित ट्रफि र उपविजेता टिमलाई १ लाख २५ हजार नगल सहित ट्रफि रहेको जिल्ला क्रिकेट संघका सदस्य सरोज कुमार मिश्रले जानकारी दिनुभयो । प्रतियोगिता जेठ २ गतेसम्म हुने आयोजकले जनाएको छ ।
प्रकाशित मिति: २०८२ बैशाख ३०, मंगलवार १९:४१
