एजेन्सी, असोज २६ । बिहारमा हुने आगामी राज्य विधानसभा चुनाव नजिकिँदै गर्दा सत्तारुढ गठबन्धन एनडीए (राष्ट्रीय लोकतान्त्रिक गठबन्धन) भित्र सीट बाँडफाँट को विवाद तीव्र बनेको छ।
केंद्रीय मन्त्री तथा हम (हिन्दुस्तानी अवाम मोर्चा) का अध्यक्ष जितन राम माँझी हालसम्मको सीट बाँडफाँटमा असन्तुष्ट देखिएका छन्। पार्टी स्रोतका अनुसार उनी २० सिटको माग गर्दै आएका छन्, तर भारतीय जनता पार्टी (भाजपा) त्यो माग मान्न तयार छैन।
भाजपा अध्यक्ष जेपी नड्डा सँगको भेटपछि पनि माँझी असन्तुष्ट रहँदै आएका छन्। यसैबीच, उनी निकट सूत्रहरूका अनुसार माँझीले अब चाँडै नै एनडीएमै रहने वा गठबन्धन छोड्नेबारे ठूलो निर्णय लिन सक्ने छन्।
माँझीका छोरा तथा बिहार सरकारका मन्त्री सन्तोष सुमन हाल दिल्लीमा छन् र पार्टीका वरिष्ठ नेताहरू सँग लगातार छलफल भइरहेको छ।
एनडीएभित्र अहिले सीट बाँडफाँटको असन्तुष्टि बढ्दै गएको छ। पहिलेदेखि नै चिराग पासवान र जितन राम माँझी दुबै असन्तुष्ट रहेको खबर बाहिर आएको थियो भने अब उपेन्द्र कुशवाहा पनि असन्तुष्ट नेताको सूचीमा थपिएका छन्।
आज उनी पनि दिल्ली पुगेका थिए र जेपी नड्डा सँग भेट गरी फर्किएका छन्, तर सीट बाँडफाँटबारे कुनै प्रतिक्रिया दिएका छैनन्।
प्रकाशित मिति: २०८२ आश्विन २६, आइतवार ०८:२८
