काठमाडौं, कात्तिक १८ । भारतीय महिला क्रिकेट टोलीले ऐतिहासिक प्रदर्शन गर्दै पहिलोपटक महिला एकदिवसीय विश्वकपको उपाधि जितेको छ। फाइनल खेलमा भारतले दक्षिण अफ्रिकालाई ५२ रनले पराजित गर्दै विश्वकप च्याम्पियन बनेको हो।
भारतले टस जितेर पहिले ब्याटिङ गर्ने निर्णय लिँदै निर्धारित ५० ओभरमा ७ विकेट गुमाएर २९८ रनको चुनौतीपूर्ण योगफल बनायो। जवाफमा दक्षिण अफ्रिकाले राम्रो सुरुवात गरे पनि भारतीय बलरहरूको कडा बलिङअघि टिक्न सकेन।
दीप्ति शर्माले बलिङतर्फ उत्कृष्ट प्रदर्शन गर्दै ५ विकेट हात पारिन् र जितमा निर्णायक भूमिका खेलिन्। उनका प्रदर्शनका कारण दक्षिण अफ्रिकाको मध्यक्रम एकपछि अर्को गर्दै ढलेको थियो।
यसअघि भारत दुईपटक फाइनल पुगे पनि उपाधिबाट वञ्चित रहँदै आएको थियो। यो जितसँगै भारतले महिला क्रिकेट इतिहासमा नयाँ अध्याय कोरेको छ।
प्रधानमन्त्री नरेन्द्र मोदीले सामाजिक सञ्जालमार्फत टोलीलाई ऐतिहासिक जितका लागि बधाई दिएका छन्।
प्रकाशित मिति: २०८२ कार्तिक १८, सोमवार ०८:३४
