धनगढी , मंसिर २२ । नेपाली कांग्रेसका सभापति शेरबहादुर देउवा र उनकी पत्नी, पूर्वमन्त्री आरजु राणा देउवा प्रतिनिधिसभा निर्वाचन लड्ने संकेत देखाइरहेका छन्। देउवा सभापतिमा पुनस् उम्मेदवारी नलड्ने अवस्थामा पनि आगामी २१ फागुनको प्रतिनिधिसभा निर्वाचनमा सक्रिय हुने अनुमान गरिएको छ।
कांग्रेसको विधानअनुसार सभापति पदमा लड्न नपाउने देउवाले लामो समय राजनीतिबाट विश्राम लिएका थिए। २४ भदौको जेन–जी आन्दोलनमा आक्रमणमा परेपछि देउवा करिब एक महिनासम्म सार्वजनिक रूपमा देखा परेनन्। तर, थाइल्याण्डमा उपचारपछि फर्किएपछि राजनीतिक सक्रियता बढेको देखिन्छ।
डेउवा दम्पतीलाई भेट्न उनका निवास महाराजगञ्जमा भीड बढेको छ। मुख्य भेटघाट डडेल्धुरा र कैलालीका कांग्रेस नेता–कार्यकर्तासँग भइरहेको छ। देउवाले डडेल्धुराबाट आठौँपटक निर्वाचन लड्ने इच्छा देखाएका छन्, यद्यपि खुलेर घोषणा भने गरेका छैनन्। केही नेताहरूका अनुसार देउवा अन्तिमपटक प्रतिनिधिसभा निर्वाचन लड्ने तयारीमा छन्।
उनकी पत्नी आरजु राणा देउवा पनि कैलाली–५ बाट निर्वाचन लड्ने संकेत दिएकी छिन्। कैलाली–५ बाट सुदूरपश्चिमका अन्य नेताहरू जस्तै नरनारायण शाह, डिल्लीराज पन्त, सुशीला मिश्रको नाम पनि चर्चामा भए पनि आरजु देउवाको सक्रियताका कारण प्रमुख उम्मेदवारका रूपमा अघि देखिएकी छिन्।
कांग्रेस कैलाली निर्वाचन क्षेत्र–५ मा उम्मेदवार सिफारिस प्रक्रिया अघि बढाइसकेको छ। महासमिति र जिल्ला कार्यसमिति अन्तर्गत एक–दुई दिनभित्र इच्छुक उम्मेदवारको नाम फाइनल हुने देखिन्छ। यदि देउवाले डडेल्धुराबाट उम्मेदवारी दिने भए, उनको नाम एकल रूपमा सिफारिस हुने तयारी छ।
नेपाली कांग्रेसभित्र देउवा दम्पतीको सक्रियताले निर्वाचन क्षेत्र र पार्टीभित्रको रणनीति पुनः सन्तुलनमा ल्याउने अनुमान गरिएको छ। आगामी प्रतिनिधिसभा निर्वाचनमा देउवा दम्पतीको भागीदारीले सुदूरपश्चिममा कांग्रेसको अभियानलाई सशक्त बनाउने देखिन्छ।
प्रकाशित मिति: २०८२ मंसिर २३, सोमवार १३:२७
