काठमाडौँ ,पुस १३ । काठमाडौँ महानगरपालिकाका मेयर बालेन्द्र शाह (बालेन)ले २ हप्तापछि महानगरको जिम्मेवारी छोड्ने भएका छन् । फागुन २१ गते हुने प्रतिनिधि सभा निर्वाचनमा राष्ट्रिय स्वतन्त्र पार्टी (रास्वपा) बाट प्रधानमन्त्रीको उम्मेदवार बन्ने पक्का भएपछि उनले माघ ६ गतेभित्र पदबाट राजीनामा दिनुपर्ने भएको हो ।

आज बिहान बालेन र रास्वपा सभापति रवि लामिछानेबीच बालेन रास्वपाबाट चुनाव लड्ने र प्रधानमन्त्री बन्ने सहमति भएको छ । सहमतिअनुसार, कानुन अनुसार उनले माघ ६ गतेभित्र काठमाडौँ महानगरपालिकाको प्रमुखको पदबाट राजीनामा दिनुपर्ने बाध्यता छ ।

काठमाडौँ महानगरपालिकामा बालेनको कार्यकाल अझै १६ महिना बाँकी छ । तर उम्मेदवार घोषणा भएसँगै उनले पदबाट छुट्ने तयारी गरिरहेका छन् । मेयर बालेनका प्रमुख स्वकीय सचिव भूपदेव शाहका अनुसार, “केही कामहरू बाँकी छन्, दुई हप्ताभित्र सकिनेछ। प्राविधिक र राजनीतिक पक्षलाई हेरेर उचित समयमा राजीनामा दिने तयारी छ, जुन लगभग दुई हप्ताभित्र हुनेछ।”

राजीनामा पछि महानगरपालिकाको कार्यवाहक व्यवस्था र प्रशासनिक व्यवस्थापनका विषयमा छलफल जारी छ । उनका निकट स्रोतका अनुसार बाँकी कामहरू समयमै सम्पन्न गर्न र प्रशासनिक संक्रमणलाई सहज बनाउन तयारी भइरहेको छ ।

राजनीतिक विश्लेषकका अनुसार बालेनको निर्णयले काठमाडौँ महानगरपालिकाको प्रशासनिक स्थिति र आगामी निर्वाचनमा राजनीतिक समीकरणमा महत्वपूर्ण प्रभाव पार्ने अपेक्षा गरिएको छ । यसले स्थानीय प्रशासन र राष्ट्रिय राजनीतिमा नयाँ ध्रुवीकरण र रणनीतिक परिवर्तनको संकेत दिएको विश्लेषकहरूले बताएका छन् ।

मेयर बालेनको राजीनामा र उम्मेदवार घोषणा शहरको प्रशासनिक जिम्मेवारी हस्तान्तरण प्रक्रिया, निर्वाचन तयारी र राजनीतिक वातावरणमा विशेष प्रभाव पार्ने छ भन्ने चर्चा अहिले तातो विषय बनेको छ ।