काठमाडौँ, पुस १४ । सेयर कारोबारी दीपेन्द्र अग्रवाललाई केन्द्रीय अनुसन्धान ब्युरो (सीआईबी) ले धरौटीमा रिहा गरेको छ। अग्रवालले ४९ लाख १९ हजार ८६५ रुपैयाँ धरौटी बुझाएर छुटेका हुन्। सीआईबीका एआइजी मनोज केसीका अनुसार अग्रवाललाई मुलुकी फौजदारी कार्यविधि, २०७४ को दफा १५ अनुसार धरौटीमा रिहा गरिएको हो।
एआइजी केसीले रातोपाटीसँग भने, “उच्च अदालत पाटनको अनुमतिअनुसार अग्रवालसँग धरौटी लिएर उनलाई रिहा गरिएको हो। दफा १५ को व्यवस्था अनुसार अनुसन्धान अधिकारीले आवश्यक देखेमा हिरासतमा रहेका व्यक्तिलाई धरौटीमा छाड्न सक्ने कानुनी अधिकार राख्दछन्।” उनका अनुसार धरौटीमा रिहा भए तापनि अनुसन्धान प्रक्रिया भने निरन्तर जारी रहनेछ।
सिआइबीले अग्रवाललाई पुस ४ गते पक्राउ गरेको थियो। उनलाई नेपाल धितोपत्र बोर्डले उजुरी गरेपछि पक्राउ गरिएको थियो। प्रारम्भिक जाँचबुझ प्रतिवेदन अनुसार अग्रवालले जोशी हाइड्रोपावर डेभलपमेन्ट कम्पनी लिमिटेडका सेयर खरिद गर्दा धितोपत्रसम्बन्धी ऐन, २०६४ को दफा ९७ (ग) बमोजिम भ्रामक विवरण प्रस्तुत गरेको आरोप छ।
धितोपत्र बोर्डको प्रतिवेदनमा उल्लेख छ कि अग्रवालले अन्य टिएमएस युजर प्रयोग गरी आपसी खरिद–बिक्री तथा आफन्तसँग सम्बद्ध संस्थाबीच वास्तविक स्वामित्व नबदलिने गरी कारोबार गरेको देखिएको छ। यसले कर्पोरेट डेभलपमेन्ट बैंकको सेयर मूल्य पनि कृत्रिम रूपमा बढाएको बताइएको छ।
सीआईबीका अनुसार अग्रवालले आफ्नो गतिविधिबाट ४९ लाख १९ हजार ८६५ रुपैयाँ गैरकानुनी नाफा कमाएको देखिएको छ। यसअघि पनि अग्रवाललाई ठगीसम्बन्धी अन्य आरोपमा पक्राउ गरिएको थियो।
धरौटीमा रिहा भएपनि अग्रवालविरुद्ध अनुसन्धान जारी रहन्छ र आवश्यक देखिए थप कानुनी प्रक्रिया अघि बढाइनेछ।
प्रकाशित मिति: २०८२ पुष १४, सोमबार १५:०७
