काठमाडौं , पुस १८ । आगामी फागुन २१ का लागि हुने प्रतिनिधि सभा निर्वाचनमा समानुपातिक तर्फ मतपत्रमा दलहरूले पेस गरेका चुनाव चिह्न मात्र देखिने भएको छ। निर्वाचन आयोगले यस सम्बन्धमा नयाँ व्यवस्था लागू गरेको छ।

आयोगका प्रवक्ता नारायणप्रसाद भट्टराईका अनुसार, विगतमा दल दर्ताको आधारमा मतपत्रमा चुनाव चिह्न राख्ने अभ्यास रहँदै आएको थियो, तर यसपटक त्यस्तो नगरी बन्दसूचीमा उल्लेखित चिह्न मात्रै राखिने व्यवस्था गरिएको छ।

निर्वाचन आयोगमा दलहरूले समानुपातिक तर्फ बन्दसूची पेस गर्दा कुल १०० दल दर्ता भएका थिए, जसमा ९३ वटा चुनाव चिह्न रहेको थियो। तर अन्तिम बन्दसूची अनुसार यो संख्या घटेर ५८ वटा चिह्नमा सीमित भएको छ।

कुल ६४ दलले ५८ चुनाव चिह्नमा चुनाव लड्ने गरी आफ्नो सूची आयोगमा पेस गरेका छन्। यसैगरी, १० वटा दलले एकल चुनाव चिह्नमा समानुपातिक तर्फ चुनाव लड्ने गरी सूची बुझाएका छन्।

यसरी तय भएको व्यवस्थाअनुसार मतपत्रमा केवल ५८ वटा चुनाव चिह्न देखिनेछ। आयोगले मतदातालाई भ्रम हुन नदिने उद्देश्यले मतपत्र व्यवस्थापनमा यस्तो परिवर्तन गरेको हो।

भट्टराईले बताए अनुसार, समानुपातिक निर्वाचन प्रणाली अन्तर्गत दलहरूले पेस गरेको बन्दसूची अनुसार मात्रै प्रतिनिधि चयन हुनेछ। यसले मतदाता र निर्वाचन प्रक्रिया दुवैलाई स्पष्ट पार्ने अपेक्षा गरिएको छ।

यो व्यवस्था लागू भएपछि मतदाताले केवल दलको चुनाव चिह्न हेरेर मतदान गर्नेछन् र व्यक्तिगत उम्मेदवारको नाम मतपत्रमा देखिँदैन।