रौतहट, चैत २० । चन्द्रपुर नगरपालिका–३, गैडाटारमा सिँचाइका लागि निर्माण गरिएको बाँध भत्किएको एक वर्ष बितिसक्दा पनि पुनःनिर्माण हुन नसक्दा यहाँका किसान समस्यामा परेका छन्।
गैडाटार सिँचाइ आयोजना अन्तर्गत चादी खोलाबाट गाउँ–गाउँसम्म पक्की कुलो विस्तार भइसकेको छ। तर पानी जम्मा गर्न बनाइएको मुख्य ड्याम भत्किएपछि किसानले अपेक्षित सिँचाइ नपाउँदै धान, तरकारी र अन्य बालीनालीमा उत्पादन घट्ने समस्या भोग्नुपरेको छ।
कृषक सन्तोष चौहानका अनुसार, “सिँचाइ नपाउँदा धान र तरकारीमा अपेक्षित उत्पादन लिन सकिएको छैन।” हाल केरा खेतीमा आकर्षण बढ्दै गएको भए पनि वर्षमा कम्तीमा दुई पटक सिँचाइ आवश्यक पर्ने भएकाले किसान चिन्तित छन्।
केरा उत्पादक किसान उपेन्द्र गोलेका अनुसार, “अस्थायी बाँधले सानो पानीको बहावले समेत बगाउने भएकाले बारम्बार मर्मत गर्नुपर्ने बाध्यता छ, जसले समय, श्रम र आर्थिक भार बढाएको छ।”
गैडाटारका किसानहरूले स्थानीय, प्रदेश र संघीय सरकारसँग ड्याम पुनःनिर्माणका लागि ध्यानाकर्षण गराएका छन्। वडाध्यक्ष बोधनाथ देवकोटा का अनुसार, ढिलाइ हुँदा कृषिमा आधारित क्षेत्रको आर्थिक अवस्था कमजोर हुने खतरा बढिरहेको छ।
किसानको पीडा कम गर्न सरकारले अब आश्वासन मात्र होइन, ठोस कार्यान्वयनमार्फत बाँध पुनःनिर्माणको काम सुरु गर्नु अत्यावश्यक रहेको बताइएको छ।
प्रकाशित मिति: २०८२ चैत्र २०, शुक्रबार १६:५०
