दिलीप कुमार यादव
कपिलवस्तु, जेठ २८ । जसपा, नेपाल कपिलवस्तु अध्यक्षका लागि मतदान शुरु भएको छ । सहमति जुटन नसके पछि अध्यक्षका  लागि मतदान प्रक्रिया सुरु भएको हो । २ बजे देखि सुरु भएको मतदानमा वर्तमान अध्यक्ष शैलेन्द्र कुमार यादव र पूर्व संघीय परिषद सदस्य रामनेवास यादवबीच प्रतिस्पर्धा भइरहेको छ।

पार्टीको जिल्ला सम्मेलनका अवसरमा आयोजना गरिएको निर्वाचनका लागि कपिलवस्तु जिल्लाभरिका प्रतिनिधिहरूको उल्लेखनीय सहभागिता रहेको छ। मतदान केन्द्रमा सुरक्षा व्यवस्था कडा पारिएको छ भने सम्पूर्ण प्रक्रिया व्यवस्थित रूपमा अगाडि बढिरहेको छ ।
पार्टीका केन्द्रीय महासचिव रामकुमार शर्माले उम्मेदवारहरूबीच सहमति गराउने प्रयास गरेका थिए। बिहानैदेखि छलफल र वार्ताको माध्यमबाट अध्यक्ष पदका लागि सर्वसम्मति कायम गर्न पहल भए तापनि अन्ततः सहमति जुट्न सकेन। एक नेताका अनुसार, “दुवै उम्मेदवार आफ्नो उम्मेदवारीमा दृढ अडानमा रहेकाले अन्ततः निर्वाचनमार्फत नेतृत्व चयन गर्ने निर्णय गरिएको हो।”
निर्वाचनप्रति पार्टी कार्यकर्ता र प्रतिनिधिहरूमा गहिरो चासो र उत्साह देखिएको छ। धेरैको विश्वास छ कि यस निर्वाचनले पार्टीभित्र लोकतान्त्रिक अभ्यासलाई थप सशक्त बनाउनेछ। एक प्रतिनिधिले भने, “निर्वाचनमार्फत नेतृत्व चयन हुनु आफैंमा लोकतान्त्रिक अभ्यासको सकारात्मक उदाहरण हो, जसले संगठनलाई अझ मजबुत बनाउनेछ।” मतदान साझ ७ बाजे सम्म हुने छ ।