एजेन्सी, असार ३२ । भारतीय वैज्ञानिक तथा इसरोका ग्रुप क्याप्टेन शुभांशु शुक्ला सहितको अक्सियम–४ अन्तरिक्षयात्री टोलीलाई बोकेको एस्पेस एक्स ड्रयागन अन्तरिक्ष यान सफलतापूर्वक पृथ्वीमा अवतरण गरेको छ । ग्रेस यु नाम दिइएको क्याप्सुल १५ जुलाई, मंगलवार दिउँसो ३ः०१ बजे भारतीय समय अनुसार क्यालिफोर्नियाको तट नजिकै प्रशान्त महासागरमा सुरक्षित अवतरण गरेको हो ।

यो २२.५ घण्टाको समन्वयित फिर्ती यात्रा अन्तर्राष्ट्रिय अन्तरिक्ष स्टेशनबाट सुरु भएको थियो, जहाँ टोलीले १८ दिन बिताएको थियो। शुभांसु शुक्ला सहित चार जना अन्तरिक्षयात्री आइएसएसमा रहँदा ६० भन्दा बढी वैज्ञानिक प्रयोगहरू सम्पन्न गरेका थिए, जसले पृथ्वीको तल्लो कक्षमा भइरहेको अनुसन्धानलाई थप बलियो बनाएको छ।

यस अभियानको सफल समाप्तिले भारतको अन्तरिक्ष क्षेत्रमा बढ्दो सहभागिता र प्रविधिमा विश्वासिलो साझेदारीको प्रतिबिम्ब प्रस्तुत गरेको छ । इसरोका ग्रुप क्याप्टेन शुक्लाले पुनःप्रवेश मिसनको पाइलटिङ गरेका थिए, जसले भारतलाई अन्तर्राष्ट्रिय अन्तरिक्ष अन्वेषणमा एक उल्लेखनीय भागीदारका रूपमा उभ्याएको छ।

स्प्ल्यासडाउनपछि टोलीलाई हेलिकप्टरमार्फत तटमा ल्याएर प्रारम्भिक स्वास्थ्य परीक्षण गरिएको छ । नयाँ वातावरणमा पुनः अभ्यस्त हुनका लागि टोलीलाई केही दिन लाग्ने जनाइएको छ।

अक्सियम–स्पेसएक्सको सहकार्य

अक्सियम –४ मिशन स्पेसएक्सको सन् २०२० यता १८औं मानवयुक्त अन्तरिक्ष उडान हो । यो मिशनले अक्सियम–स्पेसको निजी कम्पनी र विदेशी सरकारहरूका लागि अन्तरिक्षमा अन्तरिक्षयात्री पठाउने व्यवसायिक मोडललाई थप पुष्टि गरेको छ । अक्सियम कम्पनी अहिले इसरोको विकल्पका रूपमा वाणिज्यिक अन्तरिक्ष स्टेशन निर्माणको योजनामा समेत लागेको छ, जुन नासाले सन् २०३० भित्र रिटायर गर्ने तयारी गरिरहेको छ।

सुनिता विलियम्सको फर्काइसँग तुलना

यो फिर्ती भारतीय मूलकी अमेरिकी अन्तरिक्षयात्री सुनिता विलियम्स र उनका सहकर्मी बुच विलमोरको हालैको पृथ्वी फिर्तीसँग मिल्दोजुल्दो छ। उनीहरू एस्पेसएक्स फ्रिडम क्याप्सुलमार्फत मार्च महिनामा ९ महिनाको आइएसएस बसाइपछि एटलान्टिक महासागरमा अवतरण गरेका थिए।

भारतको नाम फेरि चम्कियो

शुक्लाको सफल अन्तरिक्ष यात्रा भारतको वैज्ञानिक समुदायको लागि ठूलो उपलब्धि मानिएको छ। यो मिसनले भारतलाई वैज्ञानिक तथा अन्तर्राष्ट्रिय साझेदारीको मोर्चामा अझ अगाडि सारेको छ। आगामी दिनमा भारतले अझ धेरै अन्तरिक्ष वैज्ञानिकहरूलाई अन्तर्राष्ट्रिय अभियानमा सहभागी गराउने अपेक्षा गरिएको छ।