एजेन्सी
ढाका, साउन १ । बंगलादेशका संस्थापक ‘बंगबन्धु’ शेख मुजीबुर रहमानको गृहजिल्ला गोपालगंजमा हिंसात्मक झडप भएको छ । नेशनल सिटिजन पार्टी (एनसीपी) को शान्तिपूर्ण प्रदर्शनका क्रममा भएको हिंसात्मक झडप मा बुधवार कम्तीमा चारजनाको ज्यान गएको छ भने नौ जना गोली लागेर घाइते भएका छन्।

घटनास्थलमा उपस्थित स्थानीय सञ्चारमाध्यमका अनुसार, प्रदर्शनको क्रममा प्रहरी र सरकार समर्थक कार्यकर्ताहरूबीच तीव्र झडप भएको थियो। सो क्रममा प्रदर्शनकारीहरूमाथि गोली चलाइयो र धेरैलाई अस्पताल पु¥याइयो। मृतकको शव गोपालगंज जनरल अस्पतालमा राखिएको छ । चिकित्सकहरूले पुष्टि गरेका छन् कि उनीहरू सबैलाई गोली लागेको थियो ।
गत वर्ष जुलाई–अगस्टमा प्रधानमन्त्री शेख हसीनाको अगुवाइमा रहेको अवामी लिग सरकारविरुद्ध विद्यार्थीहरूद्वारा नेतृत्व गरिएको आन्दोलनले राजनीतिक तरंग ल्याएको थियो । पाँच अगस्टमा सो आन्दोलनकै परिणामस्वरूप हसीनाको सरकार अपदस्थ भयो। त्यस आन्दोलनका अगुवाहरूले यस वर्षको फेब्रुअरीमा एनसीपी गठन गरेका थिए, जसले हाल बंगलादेशको राजनीतिक परिदृश्यमा नयाँ शक्ति बनेर उदाएको छ ।

हसीना समर्थक र प्रहरीबीच झडप

स्थानीय रिपोर्टहरूका अनुसार शेख हसीनाका सयौं समर्थकहरू शान्तिपूर्ण प्रदर्शन भइरहेका बेला प्रहरीसँग भिडे। यो भिडन्तले हिंसात्मक रूप लिएपछि स्थिति नियन्त्रणमा ल्याउन प्रहरीले गोली चलायो । प्रत्यक्षदर्शीहरुका अनुसार लाठी र इँट बोकेका प्रदर्शनकारीहरू प्रहरीमाथि आक्रमण गर्दै अघि बढिरहेका थिए। एनसीपीको ¥यालीमाथि लक्षित हमला भएको दाबी गरिएको छ।

बंगलादेशको अन्तरिम सरकारका प्रमुख मोहम्मद युनुसले गोपालगंजमा कफ्र्यू लगाइएको घोषणा गरेका छन्। उनले एक्स (पूर्व ट्विटर) मा पोस्ट गर्दै भने, “शान्तिपूर्ण ¥यालीका क्रममा एनसीपी सदस्य, पत्रकार र सुरक्षाकर्मीमाथि भएको आक्रमणको जिम्मेवार अवामी लिग र त्यसको छात्र संगठनले लिनु पर्छ।” युनुसले दोषीलाई उन्मुक्ति नदिइने प्रतिबद्धता समेत जनाएका छन्।

एनसीपीका संयोजक नाहिद इस्लामले पत्रकारहरूसँग कुरा गर्दै भने, “हामीमाथि योजनाबद्ध रूपमा आक्रमण गरिएको हो। यदि हामीले न्याय पाएनौं भने, गोपालगंजलाई मुजीबवादबाट मुक्त गर्न हाम्रो पार्टी अग्रसर हुनेछ।” उनले आफ्नो ¥यालीमाथि भएको हिंसा लोकतान्त्रिक अधिकारमाथिको कुठाराघात भएको बताए।

बंगलादेशको राजनीति फेरि एकपटक तनावग्रस्त मोडमा पुगेको छ। शेख मुजीबुर रहमानको गृहनगरमै हिंसा भड्किनु र नयाँ राजनीतिक शक्तिको उदयसँगै अन्तरिम सरकारमाथि ठूलो दबाब बढेको देखिन्छ। यो घटनाले देशको लोकतान्त्रिक अभ्यास, अभिव्यक्तिको स्वतन्त्रता र सत्ताको संक्रमणकालीन प्रकृतिलाई थप जटिल बनाउने संकेत दिएको छ ।