एजेन्सी, साउन १७ । केन्द्रीय मन्त्री तथा हिन्दुस्तानी आवाम मोर्चा (हम) का अध्यक्ष जीतनराम मांझी ले कांग्रेस नेता राहुल गान्धी र राष्ट्रिय जनता दल (राजद) का नेता तेजस्वी यादवमाथि कडा हमला गरेका छन् ।

राहुल गान्धीले महाराष्ट्र र बिहारमा ‘वोट चोरी’ भएको आरोप लगाएको विषयमा प्रतिक्रिया दिँदै मांझीले कटाक्ष गर्दै भने, “जहाँ राहुल जित्छन्, त्यहाँ चुनाव ठीक हुन्छ, तर जहाँ हामी जित्छौं, त्यहाँ धाँधली भएको भनिन्छ। यो त ठ्याक्कै ’चोर मचावे शोर’ जस्तै भयो।“

मांझीका अनुसार राहुल गान्धीले बिहारमा मत चोरेको प्रमाण दिन्छु भनेका थिए, तर अहिलेसम्म कुनै प्रमाण सार्वजनिक भएको छैन । उनले थपे, “कर्नाटक र हिमाचलमा कांग्रेस जित्दा चुनाव सही, तर एनडीएले जित्दा त्यही चुनावको पारदर्शितामा प्रश्न उठाइन्छ । यस्तो दोहोरो मापदण्ड लोकतन्त्रको अपमान हो ।“

२० लाख मृत व्यक्तिको नाम मतदाता सूचीमा रहेको भन्ने विपक्षको आरोपप्रति पनि मांझीले प्रतिउत्तर दिए । उनले भने, “२० लाख मानिस मरेका छन् भने के उनीहरूले भोट हाल्छन्? जो २० वर्षदेखि सम्पर्कमा छैनन्, के उनीहरूले मतदान गर्छन्?“ उनले दाबी गरे कि निर्वाचन आयोगको प्रक्रिया पूर्ण रूपमा पारदर्शी रहेको छ र अपात्र नामहरू सूचीबाट हटाइएको छ।

राज्यमा बढ्दो अपराधको विपक्षी आरोपलाई नकार्दै मांझीले भने, “बिहारमा कुनै गम्भीर अपराधको अवस्था छैन। पहिले ’एक अणे मार्ग’ मा अपराधीहरूसँग सम्झौता गरिन्थ्यो, अहिले त त्यहाँ कसैले जान पनि सक्दैन।“ उनका अनुसार अहिले देखिएका छिटपुट घटना राजद कार्यकर्ताहरूको योजनाबद्ध षड्यन्त्र हुन सक्छ, जुन चुनावी मौसममा मात्रै देखिन्छ।

तेजस्वी यादवले क्याग रिपोर्टको हवाला दिँदै लगाएको भ्रष्टाचारको आरोपलाई मांझीले अस्वीकार गरे । उनले भने, “बिहारमा कुनै घोटाला भएको छैन । तेजस्वी र राहुलले जतिसुकै यात्रा गरे पनि बिहारको वास्तविक अवस्था उनीहरूले बुझ्ने छैनन्, जबसम्म उनीहरू जमीनमा आएर काम गर्दैनन् ।“

मांझीको यो प्रहार बिहारको आगामी चुनावलाई ध्यानमा राखेर गरिएको स्पष्ट देखिन्छ । विपक्ष लगातार एनडीए सरकारमाथि निशाना साधिरहेका बेला मांझीले पार्टीको बचाव गर्दै राहुल र तेजस्वीलाई “चोर मचावे शोर” जस्तो तीखा बयान दिएर सियासी लडाइँलाई थप उग्र बनाएका छन्।