एजेन्सी, साउन ३१ । बिहार विधानसभा निर्वाचनको मिति नजिकिदै जाँदा मुख्यमन्त्री नितीश कुमारले हरेक निर्वाचन क्षेत्रमा डिजिटल पुस्तकालय बनाउने घोषणा गरेका छन ।
एकपछि अर्को चुनावी घोषणा गर्दै आएका नितीश कुमारले सबै निर्वाचन क्षेत्रमा रहेका सरकारी विद्यालय र आवद्ध कलेजमा डिजिटल पुस्तकालय स्थापना गरिने जनाएका छन । बिहारमा जम्मा २४३ विधान सभा (निर्वाचन क्षेत्र) रहेका छन्, जसको आधारमा २४३ डिजिटल पुस्तकालय निर्माण गरिनेछ ।
सरकारी विद्यालय तथा कलेजका विद्यार्थीलाई गुणस्तरीय शिक्षा उपलब्ध गराउन राज्य सरकारले गर्दै आएको पहल अन्तर्गत छात्रवृत्ति, निःशुल्क कोचिङको व्यवस्था वा सीप विकास तालिम लगायतका योजनाहरु रहेको छ ।
डिजिटल पुस्तकालय निर्माणका लागि ९० करोड ५० लाख ४७ हजार रुपैयाँ खर्च हुने र उक्त रकम स्वीकृत भइसकेको सरकारको भनाइ छ । प्रत्येक निर्वाचन क्षेत्रमा एक–एक डिजिटल पुस्तकालय बनाइनेछ, जसमा १० वटा कम्प्युटर जडान गरिनेछ । स्थायी बिजुली आपूर्ति सुनिश्चित गरिनेछ र उच्च गतिको इन्टरनेट जडान गरिनेछ। पुस्तकालयमा सबै पाठ्यक्रमका पुस्तकहरू डिजिटल रूपमै उपलब्ध हुनेछन्, जसलाई विद्यार्थीहरूले सजिलै पहुँच गर्न सक्नेछन्।
पुस्तकालयको प्रभावकारी सञ्चालनका लागि शिक्षकहरूलाई विशेष तालिम दिइनेछ। यसका लागि राज्य शिक्षा, अनुसन्धान तथा तालिम संस्थानमार्फत शिक्षकहरूलाई डिजिटल स्रोतहरूको अधिकतम उपयोग गर्ने सीप सिकाइनेछ। सरकारको विश्वास छ कि यो योजनाबाट ग्रामीण क्षेत्रमा बस्ने विद्यार्थीहरूले पनि शहरका विद्यार्थीसरह प्रविधि र शैक्षिक स्रोतमा पहुँच पाउनेछन्। यसले शिक्षा गुणस्तरमा महत्वपूर्ण सुधार ल्याउने अपेक्षा गरिएको छ।
यो योजना लागू भएपछि शहरी र ग्रामीण क्षेत्रमा शिक्षामा देखिने असमानता घट्नेछ। विशेष गरी गाउँका विद्यार्थीहरूलाई पुस्तक, इन्टरनेट र कम्प्युटर जस्ता आवश्यक शैक्षिक साधनहरू सहज रूपमा प्राप्त हुनेछन्। डिजिटल पुस्तकालयमार्फत विद्यार्थीहरूले परीक्षाको तयारीदेखि अनुसन्धान कार्यसम्म सबै गर्न सक्ने वातावरण प्राप्त गर्नेछन्।
राज्य सरकारले यो परियोजना छिट्टै कार्यान्वयनमा ल्याउने तयारी गरेको छ र सम्बन्धित निकायलाई निर्माण कार्य अघि बढाउन निर्देशन दिइसकेको छ। यदि यो योजना निर्धारित समयमै सम्पन्न भयो भने बिहार शिक्षा क्षेत्रमा प्रविधिक क्रान्तिको नयाँ अध्याय सुरु हुने सरकारको दाबी छ।
प्रकाशित मिति: २०८२ श्रावण ३१, शनिबार ०७:२५
