एजेन्सी, भदौ ५ । म्यानमार सेनाले करिब दुई वर्षपछि पूर्वी कयाह राज्यको डेमोसो शहरमाथि पुनः नियन्त्रण कायम गरेको छ । करिब २८ डिसेम्बरमा हुने आमनिर्वाचनअघि भएको यस घटनाले देशको राजनीतिक तथा सुरक्षागत अवस्था थप अस्थिर हुने अनुमान गरिएको छ।

सेनाले पछिल्ला केही महिनादेखि आक्रमणको तीव्रता बढाउँदै आएको थियो। स्थलसहित हवाई आक्रमणमार्फत ठूलो कारबाही चलाउँदै सेनाले डेमोसोमा प्रवेश गरेको हो। यसकारण, लामो समयसम्म प्रतिरोध गर्दै आएका स्थानीय सशस्त्र समूहहरुलाई पछि हट्न बाध्य गरिएको छ।

डेमोसो, जसलाई करेनी नामले पनि चिनिन्छ, म्यानमारको राजधानी नेपिताबाट करिब ११० किलोमिटर पूर्वतर्फ पर्छ। सन् २०२१ फेब्रुअरीमा आङ सान सू कीको निर्वाचित सरकारलाई सेनाले अपदस्थ गरेपछि सुरु भएको संघर्षमा डेमोसो लगातार गृहयुद्धको प्रमुख केन्द्र रहँदै आएको छ।

यस क्षेत्रमा सेना र विद्रोही समूहबीच धेरै पटक भिडन्त भएको छ। स्थानीय जातीय समूहहरुले लोकतन्त्र समर्थक शक्तिहरुसँग मिलेर सेनाविरुद्ध लडाइँ चालेका थिए। तर, पछिल्लो आक्रमणमा सेनाले आफ्नो बल प्रदर्शन गर्दै पुनः नियन्त्रण लिएको हो।

म्यानमारमा आगामी २८ डिसेम्बरमा चुनाव हुने तयारी भइरहेको छ। यसअघि नै विभिन्न क्षेत्रहरुमा सेना र विद्रोहीबीच तीव्र लडाइँ भइरहेको छ। विश्लेषकहरुका अनुसार, सेनाले चुनावअघि आफ्नो शक्ति प्रदर्शन गर्ने उद्देश्यले यस्तो कारबाही बढाएको हो।

डेमोसोमाथिको नियन्त्रण सेनाका लागि रणनीतिक दृष्टिले महत्त्वपूर्ण मानिन्छ, किनकि यो क्षेत्र राजधानीसँग नजिक मात्र नभई विद्रोही गतिविधिहरुको प्रमुख आधार पनि हो।

यस कारबाहीका कारण स्थानीय बासिन्दामाथि ठूलो असर परेको छ। स्थल र हवाई आक्रमणका कारण नागरिक विस्थापन बढेको छ। हजारौं मानिस सुरक्षित स्थानतर्फ पलायन भएको अन्तर्राष्ट्रिय सहायता संस्थाहरुले जनाएका छन्। खाद्यान्न, औषधि र अन्य आधारभूत आवश्यकतामा पनि संकट गहिरिँदै गएको छ।