सुर्खेत, पुस २ । आगामी ११ माघमा हुने राष्ट्रियसभा र २१ फागुनमा हुने प्रतिनिधिसभा निर्वाचनका लागि नेपाली कांग्रेसले कर्णाली प्रदेशबाट उम्मेदवार आकांक्षीको सूची तयार पारेको छ।
१५ मंसिरमा सम्पन्न कांग्रेस केन्द्रीय समितिको बैठकले प्रतिनिधिसभा(प्रत्यक्ष र समानुपातिक) र राष्ट्रियसभा सदस्यका लागि आकांक्षीको नाम केन्द्रमा पठाउन मातहतका संरचनालाई निर्देशन दिएको थियो। विधानअनुसार एक सिटका लागि तीन जनासम्मको नाम सिफारिस गर्न सकिने व्यवस्था छ। सहमति जुट्न नसके बहुमतको निर्णयलाई केन्द्रमा पठाइन्छ।
कर्णालीका १० जिल्लाबाट प्राप्त नामहरूको आधारमा कांग्रेस संसदीय समितिले उम्मेदवार चयन गर्ने तयारी गरेको छ। कांग्रेस कर्णाली प्रदेश समितिका प्रवक्ता दमन शाहीका अनुसार जिल्लाबाट प्राप्त सिफारिस बुधबारसम्म केन्द्रमा पठाइनेछ। यस पटक उम्मेदवार आकांक्षीको जम्बो लिस्ट तयार भएको छ, जसमा केही जिल्लामा सहमति जुट्न नसक्दा दर्जनौँ नेताहरूको नाम सिफारिस भएको छ।
सुर्खेतबाट प्रतिनिधिसभा प्रत्यक्षतर्फ उपसभापति पूर्णबहादुर खड्का र निवर्तमान सांसद हृदयराम थानीसहित अन्य नेताहरूको नाम सिफारिस भएको छ। समानुपातिकतर्फ नरबहादुर सोनी, भिमा मल्ल, गंगा नेपाली बस्याल, पार्वती गिरी लगायतको नाम सिफारिस गरिएको छ।
कालीकोटबाट युवा नेता भूपेन्द्रजंग शाही, पार्टी सभापति अम्बबहादुर शाही र महिलातर्फ सीता रावलको नाम सिफारिस भएको छ।
दैलेख, जाजरकोट, सल्यान, रुकुम पश्चिम, मुगु, डोल्पा, हुम्ला लगायतका जिल्लाबाट पनि प्रत्यक्ष, समानुपातिक र राष्ट्रियसभाका उम्मेदवारको सूची तयार गरिएको छ। पार्टीले बहालवाला उम्मेदवारलाई प्राथमिकतामा राख्दै विभिन्न तहका अनुभवी र स्थायी नेताहरूलाई पनि सूचीमा समावेश गरेको छ।
कर्णाली प्रदेशमा कांग्रेसको यो सूचीले आगामी निर्वाचनमा पार्टीको रणनीति स्पष्ट भएको देखाउँछ। पार्टीले अनुभवी, स्थानीय प्रभावशाली र नयाँ नेतृत्वलाई सन्तुलित गरेर उम्मेदवार छनोट गरेको छ। तर यस पटक पनि महिलालाई प्रत्यक्षतर्फ अपेक्षित अवसर कम दिएको तथ्य देखिन्छ।
कर्णालीबाट सिफारिस भएका उम्मेदवारको अन्तिम निर्णय केन्द्रले गर्नेछ। सूचीमा रहेका नेताहरूले आगामी निर्वाचनमा पार्टीको नाममा प्रतिस्पर्धा गर्नेछन्।
प्रकाशित मिति: २०८२ पुष ३, बुधवार १४:२६
