काठमाडौं, पुस ८ । नेकपा एमालेले अध्यक्ष केपी शर्मा ओलीमाथि लगाइएको स्थानहदबारे प्रश्न उठाएपछि सरकारले स्पष्ट जवाफ दिएको छ। मंगलबार दिउँसो एमाले केन्द्रीय कार्यालय, च्यासलमा सरकारले गठन गरेको राजनीतिक संवाद समितिको टोली एमाले प्रतिनिधिहरूसँग छलफलमा पुगेको थियो।
छलफलमा महासचिव शंकर पोखरेल, उपमहासचिव योगेश भट्टराई लगायत सहभागी थिए। सञ्चारमन्त्री समेत रहेका प्रवक्ता जगदीश खरेलले जानकारी दिनुभयो कि सरकारले आफ्नो कार्यक्षेत्र, विधि, प्रक्रिया र कानुनको अधिनमा रहेर निर्वाचनको वातावरण सुनिश्चित गर्ने प्रतिबद्धता जनाएको छ।
‘उहाँहरूले स्वभाविक रूपमा स्थान हदको विषय उठाउनुभयो। हाम्रो स्पष्ट जवाफ के हो भने सरकारले विधि, प्रक्रिया र कानुन अनुसार सम्पूर्ण वातावरण मिलाउँछ,’ खरेलले भने।
सरकारले यो प्रक्रियामा संलग्न अन्य स्टेकहोल्डर, जस्तै आयोगले गरिरहेको काममा कुनै प्रभाव नपर्ने पनि सुनिश्चित गरेको छ। ‘आयोगले गरिरहेको काममा प्रतिकूल प्रभाव पर्न हुँदैन, उठेका मुद्दाहरू सुनुवाइ हुनुपर्छ,’ उनले थपे।
सञ्चारमन्त्री खरेलले निर्वाचनमा सहभागी हुने अधिकारको संरक्षण र विधिसंगत वातावरण बनाउने सरकारको प्रतिबद्धता पनि दोहोर्याए। उनले वर्तमान सरकारलाई नागरिक सरकारको रूपमा वर्णन गर्दै कसैलाई अन्याय हुन नदिने दाबी गरे।
‘सबैतिरबाट अन्याय भयो भन्ने आरोपलाई हामी स्वीकार्दैनौँ। सरकार कसैलाई अन्याय हुन दिन्छैन,’ खरेलले भने।
यस छलफलले एमाले र सरकारबीच निर्वाचनको वातावरण, विधि प्रक्रिया र आयोगको स्वतन्त्रता सुनिश्चित गर्ने विषयमा प्रारम्भिक समझदारी स्थापित गरेको देखिन्छ।
प्रकाशित मिति: २०८२ पुष ९, मंगलवार १५:०२
